Qyzylordada aqsha toly seıfti urlaǵandar sottaldy

QYZYLORDA. QazAqparat - Qyzylorda qalasynda iri mólsherde urlyq jasaǵan eki turǵyn 2 jylǵa bas bostandyǵynan aıyryldy, dep habarlaıdy QazAqparat tilshisi.

Bıyl qańtar aıynda qala turǵyny polıtsııaǵa óz úıinde urlyq bolǵany jóninde shaǵym túsirdi. Onda belgisiz bireýler úıiniń qonaq bólmesiniń terezesi arqyly kirip seıfti urlap ketkeni aıtylǵan. Seıf ishinde 1 mln 450 myń teńge aqsha, altyn jáne kúmis buıymdary bar. Keltirilgen shyǵynnyń jalpy somasy 1 mln 675 myń teńgeni quraıdy.

«Atalmysh derek boıynsha QR Qylmystyq kodeksiniń 188-babynyń 3-bóligimen (urlyq) sotqa deıingi tergep-tekserý amaldary júrgizildi. Tártip saqshylary júrgizgen jedel-izdestirý sharasynyń nátıjesinde kúdikti retinde eki qala turǵyny ustaldy. Tergeý barysynda kúdiktilerdiń qylmystyq is-áreketi arnaıy sot saraptamasy jáne zertteý qorytyndysymen tolyq dáleldendi», - dep málim etti Qyzylorda oblystyq polıtsııa departamentiniń baspasóz qyzmeti.

Sot protsesinde kúdiktiler ózderi jasaǵan qylmystaryn tolyq moıyndady. Keltirilgen shyǵyn tolyǵymen óndirildi.

Eske sala ketsek, budan buryn Jalaǵashta kúrekpen adam óltirgen jigit sottalǵanyn habarlaǵan edik .