Qyzylordada «Aqmeshit-Syrdarııa» meshiti kúrdeli jóndeýden ótti (FOTO)
QYZYLORDA. QazAqparat - Búgin Qyzylorda oblysynyń ákimi Qyrymbek Kósherbaev kúrdeli jóndeýden ótken «Aqmeshit-Syrdarııa» meshitine baryp, jamaǵatty máýlit merekesimen quttyqtady.
- Biz dástúrli dinimizdi ulyqtaý arqyly Táýelsizdik qundylyqtary men patrıotızmdi nyǵaıtamyz jáne eldegi turaqtylyq pen beıbitshilikti saqtap, jastar boıynda otansúıgishtik sanany kúsheıtemiz. Álemdegi 1,5 mıllıardtan astam musylman qasterleıtin ardaqty Muhammed paıǵambarymyzdyń dúnıege kelgen máýlit aıy múbarak bolsyn, - dedi oblys ákimi Q.Kósherbaev.
Aıta keteıik, máýlit merekesi qarsańynda oblystyń bas meshiti demeýshilik esebinen kúrdeli jóndeýden ótti. Ǵımarattyń kúmbezi árlenip, ıslam qaǵıdattary boıynsha aıattar jazyldy. Qazirgi zamanǵa saı jylytý qazandyqtary, beınebaqylaý, órtke qarsy dabyl qurylǵylar ornatyldy. Namaz bólmeleriniń edenine jylý júıeleri júrgizilip, kilemderi aýystyryldy. Meshit ashanasy ǵımaraty naýryz aıynda aıaqtalatyn bolady.
Aımaq basshysy óz kezeginde jylǵa jýyq merzimge josparlanatyn osynaý aýqymdy jumystardy az ýaqytta eńsergen el azamattary men merdiger kompanııa ókilderine qyzylordalyq jamaǵattyń atynan rızashylyǵyn bildirdi.
Jalpy, oblystaǵy 157 meshitte bir aı boıy máýlit merekesine oraı túrli sharalar uıymdastyrylatyn bolady.
