Qyzylordada ákimdik bólimi kásipkerdiń qyzmetine bóget jasaǵan
QYZYLORDA. QazAqparat - Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti sybaılas jemqorlyqqa qarsy joba aıasynda front ofıs qurdy. Ol bıznes sýbektilerimen tyǵyz baılanys ornatýda úlken kómek bolyp otyr, dep habarlaıdy QazAqparat tilshisi.
Qyzylordada sybaılas jemqorlyqqa qarsy front ofıs alańynda otandyq ınvestorlarmen kezdesý ótkizildi. Investorlar quqyǵyn qorǵaýǵa baǵyttalǵan joba tanystyryldy. Kezdesýdi Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti basshysynyń orynbasary Berikbol Baıhojaev ashty. Ol Memleket basshysynyń Qazaqstan halqyna arnaǵan bıylǵy Joldaýynda aıqyndalǵan sybaılas jemqorlyqqa qarsy sharalarkeńinen qamtylǵanyn atap ótti.
Qazirgi ýaqytta oǵan ınvestorlar men kásipkerlerden 12 ótinishter túsken. Búgingi kúnge deıin onyń 8-i óz sheshimin tapsa, qalǵan 4-i qaralyp jatyr. Olardyń qatarynda kásipkerlik sýbektileriniń zańdy quqyqtary men múddelerine nuqsan keltirgeni úshin jekelengen laýazymdy tulǵalardyń áreketine qatysty ótinishter bar.
«Atap aıtqanda, Aral aýdandyq turǵyn úı kommýnaldyq sharýashylyq, jolaýshylar kóligi jáne avtomobıl joldary bólimine qatysty shaǵym bar. Bólim basshylyǵy tarapynyń zańsyz áreketimen «Jolaýshy A.B. Servıs» JShS qyzmetin júzege asyrýǵa kedergi keltirgen. Seriktestikpen jasalǵan aýdanishilik jolaýshylar tasymaldaý sharty bola tura ishki ister organdary arqyly avtobeketke seriktestiktiń kólik quraldaryn kirgizbeýdi suralǵan. Osylaı kásipkerlik sýbektiniń qyzmetine ashyq túrde bóget keltirgen. Sondaı-aq, Shıeli aýdandyq aýylsharýshylyǵy bólimi basqa kásipkerlik sýbektileriniń memlekettik satyp alý konkýrsyna qatysý quqyǵyn shektegen. Atalǵan tulǵa jerge ornalastyrý qyzmetin satyp alýdy jalpy konkýrs negizinde ótkizbeı, bir kózden satyp alý tásilimen «Gosspetszem» JShS-nen shartqa otyrǵan. Nátıjesinde basqa kásipkerlerdiń memlekettik satyp alý konkýrsyna qatysý quqyǵy shektelgen. Osy máseleler oblystyq ádep jónindegi keńes otyrysynda qaralyp, keńes sheshimimen laýazymdy tulǵalar «Atqaryp otyrǵan qyzmetine sáıkes emestigi týraly eskertý» túrindegi tártiptik jazaǵa tartyldy» - dedi Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti sybaılas jemqorlyq profılaktıkasy basqarmasynyń basshysy Baǵdat Іzkenov.
Budan buryn da Qyzylordalyq kásipkerlerge kedergi keltirgen sheneýnikter jaýapkershilikke tartylǵanyn habarlaǵan edik.
