Qyzylordada aqbóken atqan brakoner qolǵa tústi
QYZYLORDA. QazAqparat - Qyzylorda oblysynda brakonerler úsh aqbókenmen qolǵa tústi, dep habarlady QazAqparat tilshisi oblystyq ІІD silteme jasap.
Qyzylorda oblysy Qarmaqshy aýdanynyń aýmaǵynda ekologııalyq qylmystardyń aldyn alý men brakonerlik áreketterdiń jolyn kesý maqsatynda reıd ótkizildi.
Polıtseıler men «Ohotzooprom» Respýblıkalyq memlekettik qazynalyq kásiporny qyzmetkerleriniń birlesken reıdti kezinde 14 qańtar kúni Toyota Land Cruiser avtokóligi toqtatyldy.
Qarmaqshy aýdany turǵynynyń basqarýyndaǵy kóliktiń júk salǵyshynan qapqa salynǵan aqbókenniń úsh týshasy tabyldy. Budan basqa, esh qujaty joq 12-kalıbrli 1 uńǵyly ańshy myltyǵy, 7 patron men 1 aǵash sapty pyshaq tárkilendi.
«Bul fakti Qazaqstan Respýblıkasy Qylmystyq kodeksiniń 337-baby 4-bóligi boıynsha sotqa deıingi tergep-tekserýdiń biryńǵaı tizilimine tirkelip, tergeý bastaldy», - delingen taratylǵan habarlamada.
