Qyzylordada aǵylshyn tilinde sabaq beretin ustazdar kóbeıdi

QYZYLORDA. QazAqparat - Qyzylorda oblysynda bilim júıesindegi aǵylshyn tilinde oqytýǵa kezeń-kezeńimen kóshý baǵytynda oń nátıjege qol jetip otyr. Búginde Syr óńirinde aǵylshyn tilinde sabaq beretin ustazdar qatary kóbeıdi, dep habarlaıdy QazAqparat tilshisi.

Bul jóninde Elbasynyń «Ult Jospary - «100 naqty qadam» baǵdarlamasynyń 79-qadamynda kórsetilgen. Oblystyq bilim basqarmasy  2016 jyldan bastap osy baǵytta aldyn-ala daıyndyq jumystaryn júrgizdi.

«Oqýshylary aǵylshyn tilin joǵary deńgeıde jetik biletin bilim berý uıymdarynyń jumysyna saraptama jasaldy. Nátıjesinde Nazarbaev zııatkerlik mektebi, úsh tilde oqytatyn mamandandyrylǵan «Murager» mektebi, «Bilim-Innovatsııa» lıtseıleri, №4 daryndy balalarǵa arnalǵan mektep-ınternat «mamandandyrylǵan bilim berý uıymdary» bolyp eseptelgen. Bul bilim uıymdarynda aǵylshyn tili pánine bólingen qosymsha saǵattar da tereńdetip oqytýǵa bólingen saǵattar esebinen qaralǵan. Nátıjesi jaman emes. Oqýshylar halyqaralyq ǵylymı joba jarystary men pándik olımpıadalarda turaqty túrde aldyńǵy qatardan kórinip júr», - deıdi oblystyq bilim basqarmasynyń basshysy Maıra Meldebekova.

Óńirde pedagogtardyń biliktiligin arttyrýǵa da basa mán berilgen. 2016 jyldan bastap jaratylystaný-matematıkalyq baǵyttaǵy pánderdiń muǵalimderi aǵylshyn tili boıynsha kýrstardan ótýde. Atap aıtqanda, 2016 jyly - 45 muǵalim, ótken jyly - 649 muǵalim kýrstan ótken. Al aǵymdaǵy jyly olardyń 406-y kelesi deńgeı boıynsha biliktiligin arttyrýda.

Pánderdi aǵylshyn tilinde oqytýǵa kóshken muǵalimderdiń jalaqysyna 30 myń teńge qosymsha aqy tólenedi. 2021-2022 oqý jylynda oblystaǵy jalpy orta bilim beretin 260 mekteptiń (bastaýysh, negizgi mektepterin qospaǵanda) 201-i ıaǵnı 77% aǵylyshyn tilinde oqytýdy engizýdi qolǵa alǵaly otyr.

«Órleý» biliktilikti arttyrýdyń Ulttyq Ortalyǵy» AQ fılıaly Qyzylorda oblysy boıynsha pedagogıkalyq qyzmetkerlerdiń biliktiligin arttyrý ınstıtýty tarapynan da oń ister atqarylyp keledi. Oblysta 1471 aǵylshyn tili pániniń muǵalimderi bar. Olardyń  43,2%-y atalmysh ınstıtýtta biliktilikterin arttyrdy.  Sońǵy úsh jylda kýrstan ótken 635 aǵylshyn tili páni muǵalimderiniń 5,7%-y joǵary, 22,2% -y birinshi sanatty ustazdar. Instıtýttaǵy monıtorıng jáne saraptaý bólimi mamandarynyń júrgizgen saýalnamalary ótkizilgen 36 kýrstyń oqytý sapasynyń ortasha kórsetkishi 10 balldyq júıe boıynsha 9,89 ball qurap otyr.

 

Foto: kazpravda.kz