Qyzylordada «Aǵartý salasynyń generaly» atanǵan Álı Músilimulynyń bıýsti ashyldy

Saltanatty sharaǵa QR Parlamenti Senatynyń depýtaty, saıasattaný ǵylymdarynyń doktory, professor Murat Baqtııaruly, QR Parlamenti Senatynyń depýtaty Bekmyrza Elamanov jáne bilim salasynyń ardagerleri men zııaly qaýym ókilderi qatysty.

- «Barshańyzdy Alashtyń anasy - Syr eliniń bas shahary -  Qyzylorda qalasy kúnimen shyn júrekten quttyqtaımyn!

 «Ótkenge salaýat, keleshekke amanat» - demekshi, tek qalamyzda ǵana emes, aımaǵymyzdyń mańdaıaldy bilim oshaqtarynyń biri sanalatyn №101 orta mektepte Álı Músilimulynyń bıýstin ashý saltanaty, barlyq qyzylordalyqtar saǵynyp kútetin dástúrli mereke - «Qala kúni» qarsańynda uıymdastyrylýymen erekshelenýde.

Elbasymyz Nursultan Ábishuly Nazarbaev «Jalpaq jurtyńdy qurmetteý - týǵan ólkeńniń tarıhyn tanýdan, adamdaryn ardaqtaýdan turady» degendeı, eline eleýli eńbek sińirgen azamattardyń abyroıyn asyryp, rýhyn tasytý bizder úshin basty paryz dep bilemiz.

Osy maqsatta, Álı Músilimulynyń eli úshin jasaǵan eńbegi men jarqyn beınesin, jerlesteriniń jadynda máńgi saqtaý úshin bıýst ornatý el erteńi - óskeleń urpaqqa úlgi bolarlyq mańyzdy shara», - dedi qala ákimi N.Nálibaev quttyqtaý sózinde.

Álı Músilimuly - 1941 jyly Syrdarııa aýdanynyń Asqar Toqmaǵambetov aýylynda dúnıege kelgen.

Ulylyǵy men ulaǵattylyǵynyń arqasynda, sanaly ǵumyrynyń barlyǵyn bilim salasyna arnap, 40 jyldaı osy salanyń damýy men órkendeýi úshin ter tókken.

Pedagogıka ǵylymdarynyń doktory, akademık Álı Músilimuly táýelsizdiktiń alǵashqy jyldarynda, ıaǵnı qaıta qurý kezeńinde elimizdegi bilim salasyn ekonomıkalyq daǵdarystan shyǵarý maqsatynda mańyzdy reformalar men tyń jańalyqtar engizdi.

Etken eńbek, tókken terdiń arqasynda bilim salasynda jaýapty qyzmetterdi asqan zor abyroımen eńserip, qaıratker ǵalym jáne ²Aǵartý salasynyń generaly² atanǵan iri tulǵa.

Talaı jylǵy tabandy tirliktiń laıyqty baǵasyndaı «Eńbek Qyzyl tý» ordeni, «KSRO halyq aǵartý isiniń úzdigi», «KSRO Densaýlyq saqtaý isiniń úzdigi», «QazKSR aǵartý salasynyń úzdigi» tósbelgilerimen, «Eńbektegi erligi úshin» jáne táýelsizdik jyldarynan keıin «Astana», «Y.Altynsarın» medaldarymen,                     «QR Bilim berý isiniń qurmetti qyzmetkeri» belgisimen marapattalsa, 1998 jyly Qazaqstan Respýblıkasynyń Prezıdenti Nursultan Ábishuly Nazarbaevtyń sheshimimen «Qazaqstan Respýblıkasynyń eńbek sińirgen qaıratkeri» ataǵy beriledi.

Álı Músilimulynyń artynda ónegeli de ulaǵatty isterimen qatar 4 monografııa, 6 oqý quraly, 120-dan astam ǵylymı maqalalary búgingi urpaqqa mol mura bolyp qalǵan.