Qyzylordada adamdy tirideı órtegender jazasyn aldy
Oqıǵa bıylǵy jylǵy 16 mamyr kúni Qarmaqshy aýdanynyń ortalyǵy - Josaly kentinde oryn alǵan. Sol kúni saǵat 12:00 shamasynda jeke kóligimen adam tasyp júrgen E.Esetov jolaýshy retinde S.Júsipov esimdi azamatty otyrǵyzyp alady. Baratyn jerine jetip alǵasyn jolaýshy taksı júrgizýshige birge araq ishýdi usynady. Bular sosyn S.Júsipovtiń dúkennen alyp kelgen bir bótelke spırtti ishimdigin mashına salonynda otyryp ishedi. Osydan keıin E.Esetov óziniń tanysy B.Qýanbaevqa telefon shalyp, birge bolýǵa shaqyrady. Sosyn jolaı B.Qýanbaev pen S.Sháıkenov esimdi jigitterdi kólikke mingizip alǵan bular Josaly kentiniń Qabylan batyr kóshesiniń boıyndaǵy baý-baqshaǵa kelip, ishimdik ishýdi jalǵastyrady.
Osy otyrys barysynda S.Sháıkenov jábirlenýshi S.Júsipovti avtokóliktiń magnıtofonyn óshirýge jumsaǵan. Buǵan barǵysy kelmegen S.Júsipov: «Mennen de kishi adam bar ǵoı», - dep jaýap qaıtarady. Osy kelispeýshilik janjalǵa aparyp soqtyrady. Sol kezde E.Esetov óziniń jolaýshysynyń oń jaǵynan basymen uryp jerge qulatady. Budan keıin qalǵandary jabylyp, jerge qulaǵan jigitti tepkiniń astyna alady.
Birazdan keıin dene jaraqatyn alǵan S.Júsipov sol mańdaǵy aryqtyń sýyna jýynyp, esin jınap qaıtpaqshy bolǵan sátte E.Esetov ony taǵy soqqylaıdy. Al S.Sháıkenov bir uryp jerge qulatyp, B.Qýanbaev ekeýi qaıtadan tepkilegen. Bir kezde sol mańda júrgen turǵyndar aıqaı salǵanda, olar S.Júsipovti kóterip alyp, avtokólikpen alyp ketedi de Josaly kentinen 3-4 shaqyrym qashyqtyqtaǵy dalaǵa qaldyryp ketken. Alaıda, buzaqylar ózara aqyldasa kelip, ózderin quqyq qorǵaý organdaryna ustap bermeý úshin jábir kórýshini óltirmekke bekinedi. Osylaısha dalaǵa qaıtyp kelgen olar S.Júsipovti úsh ret pyshaqtap, tirideı órtep jiberedi.
Osy qylmystary úshin qylmyskerler 18 jyldan bas bostandyqtarynan aıyryldy. Olar bul jazany qatań rejimdegi túzeý kolonııasynda ótkizedi.
