Qyzylordada adam qaǵyp óltirgen kólik júrgizýshisi sottaldy
Atalmysh oqıǵa bıylǵy jyldyń 29 maýsymynda túngi saǵat 04.00 shamasynda bolǵan. Qyzylorda qalasynda turatyn azamat «Lada Granta» markaly avtokóligimen oblys ortalyǵyndaǵy Táýelsizdik dańǵyly men Sh.Esenov kóshesiniń qıylysynda jaıaý júrginshiler ótkelinen ótpekshi bolǵan 19 jastaǵy jolaýshyny qaǵyp ketken. Sodan soń qaǵyp ketken adamǵa kómek kórsetpesten oqıǵa ornynan ketip qalǵan.
«Sonyń saldarynan A.Teńizbaı mıdyń aýyr jabyq jaraqatyn alyp, oqıǵa ornynda qaıtys bolǵan. Atalǵan derek boıynsha kólik júrgizýshisi ústinen QR Qylmystyq kodeksiniń 345-babynyń 3-bóligimen jáne 347-babymen qylmystyq is qozǵaldy. Onda kólik quraldaryn basqaratyn adamnyń jol júrisi qaǵıdalaryn buzýy arqyly abaısyzda adam ólimine ákep soqqan áreket jáne jol-kólik oqıǵasy bolǵan jerden ketip qalý jaǵdaıy kórsetilgen. Sol boıynsha qylmystyq is tirkelip, tergep-tekserý amaldary júrgizilip, is sotqa joldanǵan.
Qyzylorda qalasynyń №2 soty úkimimen kinási tolyǵymen dáleldenip, júrgizýshi kináli dep tanyldy. Sot úkimimen ol 5 jyl merzimge kólik quralyn basqarý quqyǵynan jáne 1 jyl merzimge bas bostandyǵynan aıyryldy. Qazirgi tańda atalǵan sot úkimi zańdy kúshine endi. Sottalýshy jazasyn qylmystyq atqarý júıesiniń qaýipsizdigi barynsha tómen mekemesinde óteýde», - dep málim etti Qyzylorda qalasy prokýratýrasynyń bólim prokýrory Móldir Jansúgirova.