Qyzylordada «Adal urpaq» erikti mektep klýbtary qaýymdastyǵynyń sleti ótti
QYZYLORDA. QazAqparat - Búgin oblystyq №4 daryndy balalarǵa arnalǵan mektep-ınternatynda «Adal urpaq» erikti mektep klýbtary qaýymdastyǵynyń alǵashqy ret oblystyq І sleti ótti, dep habarlady QazAqparat HAA tilshisi.
500-den asa klýb músheleriniń qatysýymen ótkiziletin keń kólemdegi sharada oqýshylar oblystyq «Adal urpaq» erikti mektep klýbtary qaýymdastyǵynyń qataryna saltanatty túrde qabyldanyp, tósbelgiler taqty.
Sharaǵa Qazaqstan Respýblıkasynyń memlekettik qyzmet isteri jáne sybaılas jemqorlyqqa qarsy is-qımyl agenttigi Qyzylorda oblysy boıynsha departamentiniń basshysy A. Muhımov, oblystyq bilim basqarmasy basshysynyń mindetin atqarýshy Q. Ertashova, Qyzylorda qalalyq jáne aýdandyq bilim bólimderiniń basshylary jáne klýb músheleri qatysty.
Bolashaqtyń enshisin arqalaıtyn jastar jahandyq syn qaterlerge tótep berýde shar bolattaı shyńdalǵan rýh pen ónegeli ilimdi boıyna ushtastyra bilýi qajet. Al, sol syn qaterlerdiń basynda - qoǵamdaǵy sybaılas jemqorlyq ta bar.
Qazaqstan Respýblıkasynyń memlekettik qyzmet isteri jáne sybaılas jemqorlyqqa qarsy is-qımyl agenttigi 2016-2017 oqý jylynda Qazaqstan Respýblıkasy Bilim jáne ǵylym mınıstrligimen birlesip ázirlegen«Rýhanı-adamgershilik jáne azamattyq-patrıottyq tárbıeleý kontekstinde sybaılas jemqorlyqqa qarsy mádenıetti mektep ortasynda qalyptastyrý baǵdarlamasy» búginde Qyzylorda oblysynda qarqyndy iske asyrylyp keledi.
Baǵdarlama josparyna sáıkes, óńirdegi 284 jalpy bilim beretin mektepterde «Adal urpaq» erikti mektep klýbtarynyń jumysy uıymdastyrylyp, jastardyń boıynda ónegelilik, jaýaptylyq, bastamashyldyq, patrıottylyq syndy qasıetter men sybaılas jemqorlyqqa qarsy mádenıetti qalyptastyrý baǵytyndaǵy keshendi sharalar qolǵa alyndy. Qazirgi tańda klýb quramynda 5 jarym myńnan asa músheleri bar.
Slet barysynda oblystyq «Adal urpaq» klýb qaýymdastyǵy qurylyp, bilim berý salasynda sybaılas jemqorlyqqa qarsy mádenıetti qalyptastyrý úshin Qazaqstan Respýblıkasynyń memlekettik qyzmet isteri jáne sybaılas jemqorlyqqa qarsy is-qımyl agenttigi Qyzylorda oblysy boıynsha departamenti men Qyzylorda oblystyq bilim basqarmasynyń basshylarymen memorandýmǵa qol qoıyldy.
