Qyzylordada Ábish Kekilbaevtyń shyǵarmashylyǵyna arnalǵan derekti fılm kórsetildi
QYZYLORDA. QazAqparat- Keshe Qyzylorda qalasyndaǵy «Jibek joly» oıyn-saýyq ortalyǵynyń kıno zalynda zamanymyzdyń zańǵar jazýshysy, memleket jáne qoǵam qaıratkeri Ábish Kekilbaevtyń shyǵarmashylyǵyna arnalǵan «Samǵaý» derekti fılmi kórsetildi, dep habarlaıdy QazAqparat oblystyq mádenıet basqarmasyna silteme jasap.
Stsenarıı avtory, kınorejısser Jańabek Jetirýov bul ıdeıanyń 2009 jyly - jazýshynyń jetpis jyldyǵynda kelgenin aıtady.
Kórsetilim Qazaqstannyń halyq jazýshysyn eske alý sharalary aıasynda uıymdastyryldy. Kórermen qatarynda bolǵan oblystyq máslıhat hatshysy Naýryz Baıqadamov: «Ábish Kekilbaev - abyzdardyń jalǵasy. Osyndaı tulǵany kórsetý - sizdiń júrektiligińiz. «Nartáýekel» dep kirisken eńbegińizdiń nátıjesi», - deı kele, rejısserǵa alǵys bildirdi.
Jańabek Jetirýov aldaǵy ýaqytta jazýshynyń Eńsep degen qudyqshy týraly «Shyńyraý» povesiniń jelisimen de kıno túsirmek.
