Qyzylordada Abaıdyń 175 jyldyǵyna oraı birqatar is-shara ótedi
Uly aqynnyń mereıtoılyq sharasy Nartaı Bekejanov atyndaǵy Qyzylorda oblystyq qazaq akademııalyq mýzykalyq drama teatrynda «Abaı» spektaklimen bastaldy. Bul spektakl jyl boıy júrgiziledi. Sondaı-aq, Á.Tájibaev atyndaǵy Qyzylorda oblystyq ámbebap ǵylymı kitaphanasynda «Kemeńgerliktiń bıik shyńy - Abaı» taqyrybymen keńeıtilgen turaqty kórme ashyldy.
«Endi 12 aqpan kúni C. Aıtbaev atyndaǵy kórkemsýret galereıasynda «Qanat jaıǵan rýhanııat» atty taqyryptyq kórme jumysyn bastaıdy. Kórkemsýret galereıasynda 21 aqpannan bastap Semeı qalasynan arnaıy shaqyrtýmen Abaıdyń «Jıdebaı-Bórili» memlekettik qoryq-mýzeıiniń «Abaı - dana, Abaı - dara qazaqta» kóshpeli kórmesi kópshilik nazaryna usynylady. Bul shara oblys halqynyń Abaı álemimen jaqyn tanysýyna jaǵdaı jasaý maqsatynda qolǵa alynady. Al 27 aqpan kúni «Danalyqqa qurmet, erlikke taǵzym» atty respýblıkalyq aqyndar aıtysy ótkizilse, Syr óńirinde alǵash ret Ahmet Jubanov, Latıf Hamıdı «Abaı» operasynan úzindi qoıylyp, «Kózimniń qarasy» atty oblystyq vokalıster konkýrsy, «Uly dala yrǵaqtary» atty Abaı ánderine qoıylǵan oblystyq bı baıqaýy bolady», - dedi oblystyq mádenıet, muraǵattar jáne qujattama basqarmasynyń basshysy Mıra Ábýova.
Basqarma basshysynyń aıtýynsha, odan keıingi kezekte «Uly halyqtyń - Uly Abaıy», «Abaı dara, Abaı dana qazaqta», «Álemge tanylǵan Abaı», «Kemeńgerliktiń bıik shyńy – Abaı», «Asyl sózdi izdeseń, Abaıdy oqy erinbe» atty kitap kórmeleri men ádebı keshteri, Turmaǵambet atyndaǵy halyq aspaptar orkestriniń «Abaıdyń án álemi» atty kontsertin ótkizý josparlanyp otyr.
Budan buryn Qyzylordada «Abaı qazynasyna saıahat» klýby ashyldy.
