Qyzylordada Abaı Qunanbaev mektep bitirdi
QYZYLORDA. QazAqparat - Qyzylorda oblysynyń Syrdarııa aýdanyndaǵy Besaryq aýylynda turatyn Abaı Qunanbaev kenttegi №147 mektepti bitirdi, dep habarlaıdy QazAqparat tilshisi.
Qazaqtyń uly aqynymen esimi de, tegi de birdeı jas óren qashanda sol ardaqty atqa kir keltirmeýge tyrysady. Árdaıym ózin qyrlarymen tanytýǵa kúsh salady. Onyń atasy Qunanbaı nemeresi dúnıege kelgende oılanbastan Abaı esimin qoıǵan.
«Abaı atamyzdyń halqymyz úshin óte qadirli ekenin jaqsy bilemin. Bul men úshin úlken jaýapkershilik júkteıdi. Úıdegi úlkender ol jaıynda jıi aıtyp otyrady. Meniń esimim men tegimdi alǵash estigender tańǵalys bildiredi. Qaıtalap suraıtyndary da kezdesedi. Sol senimdi aqtaýǵa kúsh salamyn», - deıdi jas túlek.
Abaı aldyna úlken maqsat qoıyp otyr. Ózi energetıka salasynda qyzmet etkisi keledi. Jalpy, bul mamandyq ıeleri aýyldyq jerlerde sırek kezdesedi. Sondyqtan Abaı keleshekte týǵan aýylyna qyzmet etkisi keledi.
Syr óńirinde qazaqtyń ataqty azamattarymen esimi de, tegi de bir azamattar kóptep kezdesedi. Olardyń qatarynda Ybyraı Altynsarın, Shoqan Ýálıhanov, Bıbigúl Tólegenova, Muqaǵalı Maqataev, Raqymjan Qoshqarbaev, Muhtar Shahanov, Mádına Erálıeva, Meırambek Bespaev syndy jastar kóp.
Búgin Qyzylorda oblysynda 7 113 jas túlek mektep bitirdi. Olardyń 4 821-i ulttyq biryńǵaı testileý synaǵyna qatysýǵa nıet bildirip otyr. Túlekterdiń arasynda 343-i «Altyn belgige» úmitker bar.
Ádiljan Úmbet
