Qyzylordada «Abaı qazynasyna saıahat» klýby ashyldy
Bul jaǵymdy jańalyq oblys ortalyǵyndaǵy «Dostyq úıinde» ótkizilgen mádenı shara barysynda belgili boldy. Klýbqa Abaı murasyna erekshe qyzyǵýshylyq tanytyp júrgen 35 adam qabyldandy .
Oblystyq Qazaqstan halqy assambleıasynyń uıymdastyrýymen ótken mazmundy shara barysynda birqatar azamattar oı-pikirin bildirdi. Olardyń qatarynda fılologııa ǵylymynyń kandıdaty, dotsent, abaıtanýshy Sara Baqtııarqyzy, uly aqynnyń 200 óleńin jatqa biletin jas fılolog Elena Pak, Qoǵamdyq kelisim keńesiniń múshesi Aleksandr Abanın, Abaıdyń beınesin ásem beıneleıtin jas qylqalam sheberi Jaına Balyqbaeva jáne ózge de azamattar bar.
Taǵylymy mol sharany «Qoǵamdyq kelisim» ortalyǵynyń aǵa sarapshysy, klýb jetekshisi Shakızat Abdramanova jáne Qorqyt ata atyndaǵy Qyzylorda memlekettik ýnıversıtetiniń stýdenti Elena Pak júrgizdi. Eń aldymen klýbtyń maqsat-mindetteri, aldaǵy jumys-josparlary tanystyryldy. Uly Abaıdyń shyǵarmashylyǵy týraly abaıtanýshy Sara Baqtııarqyzy sóz sóılep, dala danyshpany atanǵan tulǵanyń murasy jóninde óz pikirin bildirdi. Jas urpaqty Abaıdaı dananyń káýsar bulaǵynan sýsyndap ósýge shaqyrdy. Qoǵamdyq kelisim keńesiniń múshesi Aleksandr Abanın Abaıdyń Pýshkın, Lermontovpen ushtastyrǵan beınesi jóninde oı bólisti.
Tanymdyq sharada klýb músheleri «Kózimniń qarasy» ánin ásem oryndaldy. Tusaýkeserde uly aqynyń beınesin ózindik tanymy arqyly beınelep kórsetken jas qylqalam sheberi Jaına Balyqbaevaǵa qatysýshylardyń iltıpaty erekshe boldy. Klýbtyń sońynda múshelikke qabyldanǵan 35 adamǵa arnaıy ázirlengen «Abaı klýbynyń múshesi» kýáligi tabystaldy.
Budan buryn Qyzylordada Abaıǵa arnalǵan kitap kórmesi ashylǵanyn habarlaǵan edik.
