Qyzylordada 96 jastaǵy keıýana qolónermen aınalysady
QYZYLORDA. QazAqparat Qyzylorda oblysy, Jalaǵash aýdanyna qarasty Mádenıet aýylynda turatyn Ótesh Tasjúrekqyzyn jergilikti jurt eń egde qolóner sheberi retinde baǵalaıdy. Ústimizdegi jyly 96 jasqa tolǵan keıýana áli kúnge deıin túskıiz basý isinen qol úzgen emes, dep habarlaıdy QazAqparat tilshisi.
Qolóner sheberi erte kezden-aq ulttyq ónerdiń qasıetin sezinip, onyń qyr-syryn jetik bilip ósti. Beride ózi de qanshama qundy dúnıelerdi jasap, eldiń alǵysyna bólendi. Keıýana jasaǵan zattardy kórgen jurt joǵary baǵasyn berip, keıbirin attaı qalap surap alyp jatatyn edi. Úı qabyrǵasyn sándeýge arnalǵan túskıiz kezinde joǵary baǵalanatyn. Tabıǵı dúnıelerden jasalatyn ol árbir úıdiń tórinen tabylýshy edi. Degenmen qazir oǵan suranys burynǵydaı emes.
«Kezinde túskıiz - sándik úshin tósektiń tusyna ustaıtyn úı jıhazdarynyń biri edi. Kóbinese tósek tusyna ustalatyn bolǵandyqtan túskıiz atalǵan. Túskıizdiń sheti túrli-tústi jippen órnektelip kestelengen barqyt, máýiti, shuǵa sekildi bir tústi matamen kómkeriledi. Ortasynda úılesimdi jibek, maqpal, qymqap sekildi matalar salyp kıizben astarlaıdy. Keıde aq kıizdiń betine túgeldeı qyzyl, sary, kók tústi oıý japsyrady.
Erterekte túskıizdiń qyzyl bylǵaryny kúmispen áshekeılep jasaǵan túri de bolǵan. Túskıizdiń kestesi kóbinese birtutas mazmundaǵy birneshe órnekten turady. Atap aıtqanda, olar múıiz, gúl, japyraq, shyrmaýyq, túıetaban, alqa sekildi unamdy úılesken tutas jelisi jasalady. Sol arqyly túrli-tústi jippen, ishinara merýert, marjanmen tigiledi», - deıdi qolóner sheberi.
Qashanda qonaqjaı qalpynan jazbaǵan qazaq halqy oǵan arnalǵan arnaıy kıiz úı jasaqtaǵan. Bul úıdiń jasaý-jabdyǵyna da erekshe kóńil aýdarylyp, óte sándi buıymdar qoıylǵan. Solardyń qatarynda túskıiz de bar.
«Qazir bul dúnıege jetkilikti túrde mán bere almaı kelemiz. Bul buıymdardy zamanǵa saı jasap shyǵýǵa nazar aýdarǵanymyz durys. Sonda jas urpaqqa ulttyq qundylyqtardy nasıhatataı alamyz», - deıdi ájeı.
Jaqynda keıýana Astananyń 20 jyldyǵyna oraı ulttyq qundylyqtardy dáriptegen arnaıy sharanyń qonaǵy boldy. Onda túskıiz jasaý, baý toqý sekildi dúnıelerdi jastardyń nazaryna usyndy. Shara barysynda kúbi shaıqaý, keli túıý, dıirmen tartý, shı toqý, qurt jaıý sekildi turmystyq jumystardy qolmen jasap kórsetti.
Búginde urpaǵymen baqytty ǵumyr keship jatqan asyl ana 11 perzentke jaryq dúnıe syılady. Qazir nemere men shóbere súıip otyr. Ardaqty ana áli de eńbekten qol úzgen emes. Esik aldyndaǵy baý-baqshany kezinde jaıqaltyp ósirgen. Balalarynyń aıtýynsha, ol jemis aǵashtaryn óz qolymen otyrǵyzyp, barynsha kútim jasaǵan. Sonyń arqasynda áli kúnge deıin jemis aǵashtary jaıqalyp, mol ónimge negiz qalap júr. 
