Qyzylordada 84 jastaǵy qarııa koronavırýs vaktsınasyn saldyrdy

QYZYLORDA. QazAqparat - Qyzylorda oblysynda 84 jastaǵy qarııa Jumaǵalı Myrzaǵalıev koronavırýs vaktsınasyn saldyrdy, dep habarlaıdy QazAqparat tilshisi.

Syrdarııa aýdanynyń turǵyny Jumaǵalı Myrzaǵalıev 84 jasqa toldy. Ol otbasymen birge ekpe qabyldap, endi turǵyndardy vaktsına saldyrýǵa shaqyrady.

«Meniń jasym 84-te. Qyzym, nemerelerim dáriger. Osy ýaqytqa deıin túrli aýrýǵa qarsy ekpe qabyldap júrgen edim. Olardyń qatarynda tumaýǵa qarsy ekpelerdi jylda-jyl alyp, derttiń bárin eńserdim», – deıdi eńbek ardageri.

Eńbek ardageri koronavırýs indetine qarsy saqtyq sharalaryn qamtamasyz etý úshin Syrdarııa aýdandyq ortalyq aýrýhanasyna kelip, óziniń jáne otbasysynyń saýlyǵy úshin ekpe qabyldaǵan.

«Óz otbasymda 18 jasqa tolǵan adamnyń barlyǵy koronavırýsqa qarsy egilgen. Mamandar aldymen meniń qan qysymymdy, dene qyzýymdy ólshedi. Buǵan deıin qabyldaǵan em-domdaryndy saraptap, ekpe qabyldaýǵa jaraıtynymdy anyqtady. Sóıtip, ekpeniń birinshi kezeńin aldym. Ekpe qabyldaǵannan keıin kútý zalynda dárigerlerdiń baqylaýynda boldym. Denemde eshqandaı ózgeris, keri nátıje bolǵan joq. Qazir ekpege qatysty alyp-qashpa áńgime kóp. Bos sózge senýge bolmaıdy. Dárigerlerdiń ǵana keńesine qulaq asqan jón», - deıdi zeınetker.

Aıta ketsek, qazir Qyzylorda oblysynda indet juqtyrǵan 12 580 adam tirkelse, onyń 77 paıyzy jazyldy. Pnevmonııamen aýyrǵan 1867 naýqastyń 1580-i emdelip shyqty. Osy jyldyń maýsym-shilde aılarynda ınfektsııalyq tósek-oryn sany 585-ten 2340-qa deıin, al reanımatsııalyq tósek oryn sany 90-nan 172-ge deıin kóbeıtildi. Qazirgi tańda júkteme 55 paıyzdy qurap otyr.

Eske salsaq, Qyzylorda oblysynda turǵyndardyń 61 paıyzy vaktsına saldyrdy.