Qyzylordada 80 sport jáne balalar oıyn alańdary salynady
Bul týraly aımaq basshysy Nurlybek Nálibaev Memleket basshysynyń Jarlyǵyna sáıkes jarııalanǵan Balalar jyly aıasynda qala, aýdan ákimderine demeýshiler arqyly óńir búldirshinderine tartý jasaýdy tapsyrǵan. Qazirgi tańda salynatyn oıyn alańdarynyń aýmaqtary belgilenip, qajetti jer telimderi tabystalǵan.
Oıyn jáne sport alńadarynyń 50-i oblys ortalyǵynda, qalǵan 30-y aýdandarda qurylystary bastalyp jatyr.
Sporttyq trenajerlar, balalar oıyn jáne fýtbol alańydarymen qamtylatyn bul nysandar negizinen qalanyń shet aımaqtary men aýyldyq eldi mekenderde turǵyzylmaq.
Búginde Qyzylorda qalasynda 32 alańnyń qurylysy bastalsa, aýdandarda 6 oıyn aalańynyń qurylysy aıaqtalǵan jáne 5 alańnyń qurylysy júrgizilýde.
Mejelengen 80 alańdy qyrkúıek aıynda tolyq paıdalanýǵa berý josparlanǵan.
Balalar jyly aıasynda Qyzylorda oblysynda jyl sońyna deıin jetkinshekterge arnalǵan taǵy 10 nysan paıdalanýǵa beriledi dep kútilýde. Onyń ishinde 6 mektep, daryndy balalarǵa arnalǵan 2 ortalyq, 1 balabaqsha, 1 Oqýshylar saraıy men Óner mektebi bar. Munymen qosa jańa oqý jyly qarsańynda jergilikti kásipkerler 3 jekemenshik mektepti iske qospaq.
Al Balalar jylyndaǵy eń úlken syı – Qyzylorda qalasynda zamanaýı úlgidegi Oqýshylar saraıyn salý týraly «QazMunaıGaz» ulttyq kompanııasymen kelisim jasaldy. Bul záýlim ǵımarat Syrdarııa ózeniniń sol jaǵalaýynda ornalasqan jańa turǵyn aýdanda boı kóteretin bolady.
Sonymen qatar, turǵyndardyń sport nysandaryna qoljetimdiligin arttyrý maqsatynda oblys kóleminde 7 dene shynyqtyrý-saýyqtyrý kesheni men 6 mádenıet úıi paıdalanýǵa beriledi.
Jalpy «Balalar jyly» aıasynda qyzylordalyq búldirshinderge jan-jaqty jaǵdaılar men qoldaýlar qarqyndy kórsetilýde. Sonyń biri - bıyldyń ózinde 8 myńnan astam bala óńirdegi lagerlerde tynyǵatyn bolady.
Sondaı-aq «Atameken» balalar aýylynyń túlekterine Qorqyt ata atyndaǵy Qyzylorda ýnıversıtetiniń bilim granty tabystalyp, 45 balaǵa «Qambash» lagerine joldama úlestirildi, kópbalaly otbasylar úshin oblys ortalyǵynan 50 páterli turǵyn úı tabystaldy.
Aıta keteıik, 1 maýsym - halyqaralyq balalardy qorǵaý kúni qarsańynda ortalyq stadıonda uıymdastyrylǵan merekelik shara barysynda arnaıy sanattaǵy balalar men halyqaralyq olımpıada júldegerleri atanǵan 100 balaǵa velosıped, 10 noýtbýk jáne «Baldaýren» respýblıkalyq lagerine joldama berilgen.
