Qyzylordada 8 adamdy arbaǵan alaıaq sottaldy
QYZYLORDA. QazAqparat - Qyzylordada úı salýǵa jer alyp beremin degen jeleýmen 8 adamnyń senimine kirip, jalpy somasy 557 myń teńgeden astam aqshany alaıaqtyq jolmen ıemdengen azamat ustaldy, dep habarlaıdy QazAqparat tilshisi oblystyq ishki ister departamentiniń baspasóz qyzmetine silteme jasap.
Jábirlenýshilerdiń barlyǵy jergilikti ishki ister organdaryna byltyr shaǵymdanǵan. Olardyń shaǵymy negizinde kúdiktiniń jeke basy týraly málimetter anyqtaldy. Ol, 29 jastaǵy Jańaqorǵan aýdanynyń turǵyny bolyp shyqty.
Jańaqorǵan aýdandyq ishki ister bólimi alaıaqtyq deregi boıynsha Qazaqstan Respýblıkasy Qylmystyq kodeksiniń 190-baby, 2-bóligi negizinde sotqa deıingi tergep-tekserý jumystary júrgizilgen. Tergeý jumystary barysynda kúdikti eń alǵash 2016 jyldyń tamyz aıynda aýdan turǵynyn jer alyp, úı qujattaryn durystap berýge kómektesetinine sendirip, qyzmetin 93 myń teńgege baǵalaǵan. Odan keıingi kezekte de qanshama adamnan aqshany alaıaqtyq jolmen aldap alǵan.
Jan-jaqty tergeý áreketteri júrgizilip, kúdiktiniń kinási tolyq dáleldenip, sot sheshimimen 3 jylǵa bas bostandyǵy shekteldi.
Ádilet Qańtarbaev
