Qyzylordada 7 márte urlyqqa túsken jasóspirim Shymkentten tabyldy
2004 jyly dúnıege kelgen jasóspirim úıden, qoımadan, avtkólikten jeti márte urlyq jasaǵan.
Osyǵan baılanysty oblystyq kámeletke tolmaǵandardyń isteri jónindegi mamandandyrylǵan aýdanaralyq soty úkim shyǵardy.
Jasóspirim QR Qylmystyq kodeksiniń 188-babynyń 3-bóliginiń 2,3-tarmaqtarymen kináli dep tanyldy.
Oǵan úsh jylǵa bas bostandyǵynan aıyrý jazasy taǵaıyndaldy.
«QR Qylmystyq kodeksiniń 63-babyna sáıkes taǵaıyndalǵan bas bostandyǵynan aıyrý jazasy shartty dep sanalyp, oǵan probatsııalyq baqylaý belgilengen. Sondaı-aq, atalǵan kodekstiń 84-babynyń 1-bóliginiń 5) tarmaǵynyń talaptaryna saı kámeletke tolmaǵan sottalǵanǵa qatysty eki jyl merzimge erekshe rejımde ustaıtyn bilim berý uıymdaryna ornalastyrý túrindegi tárbıelik yqpaly bar májbúrleý sharasy qoldanylǵan. Úkim bıyl 7 aqpanda zańdy kúshine engen bolatyn. Úkimdi oryndaýdan jaltarǵan jasóspirim turǵylyqty meken-jaıynan belgisiz baǵytqa ketip qalǵan. Qyzylorda qalasynyń polıtsııa basqarmasynyń qyzmetkerleri izdestirý barysynda ony Shymkent qalasynan tapty», - dep málim etti Qyzylorda oblystyq polıtsııa departamentiniń baspasóz qyzmeti.
Vedomstvo málimetinshe, qazirgi tańda ol Shyǵys Qazaqstan oblysynda ornalasqan erekshe rejımde ustaıtyn arnaıy mektep-ınternatqa ornalastyryldy.