Qyzylordada 600 páterlik kópqabatty turǵyn úıdiń irgetasy qalandy (FOTO)
QYZYLORDA. QazAqparat - Búgin oblys ortalyǵyndaǵy jańadan boı kótergen «Araı-3» móltek aýdanynda 12 kópqabatty turǵyn úıdiń qurylysy bastaldy. Joba «Báıterek» UBH» AQ arqyly «Óńirlerdi damytýdyń 2020 jylǵa» deıingi baǵdarlamasy aıasynda júzege asyrylmaq.
Turǵyn úıdiń irgetasyn qalaý rásimine oblys ákimi Qyrymbek Kósherbaev pen «Báıterek» UBH» AQ-nyń basqarma tóraǵasy Qýandyq Bıshimbaev qatysty.
- Ótken jyly oblys boıynsha 54 kópqabatty úı paıdalanýǵa berildi. Al bıyl 67 turǵyn úı salamyz dep josparlap otyrmyz. 2015 jyly 2 684 oblys turǵyny úıli boldy. Osy jyly 3 myń adamdy baspanamen qamtýǵa múmkindik bar, - dedi oblys ákimi Qyrymbek Kósherbaev.
«Báıterek» ulttyq basqarý holdınginiń basshysy qıyndyqtarǵa qaramastan óńirlerde qurylystyń qarqyndy júrgizilip otyrǵandyǵyn atap ótti.
«Qarjylyq qıyndyqtarǵa qaramastan Qyzylordada turǵyn úı qurylysy qarqyndy júrgizilýde. Qurylys aýmaǵynda barlyq ınfraqurylym máselesi sheshilgen. Josparǵa sáıkes turǵyn úılerdi qyrkúıek aıynda paıdalanýǵa beretin bolamyz», - dedi Qýandyq Bıshimbaev.
Jobanyń jalpy quny 6 mlrd teńgeden asady. Bıylǵy bir jyldyń ishinde úı kezeginde turǵandardyń 24,3 paıyzy baspanaly bolady.
«Báıterek» UBH» AQ arqyly Qyzylordada jalpy sany 1 230 páterdi quraıtyn 24 kópqabatty úıdiń qurylysy júrgizilýde. Budan bólek, «Samuryq-Qazyna» AQ, «Turǵyn úı qurylys jınaq banki» AQ-men birlesip, 3 myńnan astam páter paıdalanýǵa beriledi. Aıta keteıik, salynatyn úılerdiń sapasy qatań baqylaýda. 
