Qyzylordada 6 mıllıon teńgeniń múlkin qoldy etken urylar ustaldy
ASTANA. QazAqparat - Polıtsııa qyzmetkerleri Qyzylorda qalasynyń aýmaǵynda páter urlyǵyn kásip etken 32 jastaǵy eki kúdiktini quryqtady, dep habarlady búgin Qyzylorda oblystyq Іshki ister departamentiniń baspasóz qyzmeti.
Ótken jyldan beri Іshki ister organdaryna oblys ortalyǵynyń 5 turǵyny páter urlyǵy boıynsha aryzdanǵan. Jábirlenýshiler polıtsııa qyzmetkerlerine olardyń páterine belgisiz bireýlerdiń syrtqy úı esigin ashyp, qymbat baǵaly zergerlik buıymdaryn jáne basqa da baǵaly zattar men aqshalaryn urlaǵanyn habarlaǵan.
Máselen, 2016 jyly polıtsııaǵa 58-jastaǵy qala turǵyny aryzdanyp, Jalańtós Bahadúr kóshesinde ornalasqan kóp páterli úıiniń esigin belgisiz azamattar kúndizgi ýaqytta ashyp kirip, 2 dana altyn alqasyn, 2 dana kýlonyn, 2 dana altyn syrǵasyn qoldy etip, 2 mıllıonnan asa shyǵyn keltirgenin kórsetken.
Tártip saqshylary páter urlyǵyna qatysty kúdiktilerdiń izine túsip, jedel-izdestirý is-sharasy barysynda Qaraǵandy oblysynda 2 kúdikti azamatty quryqtady. Olar 1985 jyly týǵan Temirtaý jáne Kentaý qalasynyń turǵyndary bolyp shyqty.
Polıtseılerdiń anyqtaýy boıynsha, kúdiktiler kúndiz páter ıeleriniń úıde bolmaǵanyn paıdalanyp, ózderiniń kiltter jınaǵymen syrtqy esiktiń qulpyn ashý arqyly ishke kirip, azamattardyń úıindegi barlyq baǵaly zattaryn, aqshalaryn, altyn buıymdaryn urlap ketip otyrǵan. Olar 5 jábirlenýshige shamamen 6 mıllıonǵa jýyq shyǵyn keltirgen.
Osy derekke baılanysty, Qazaqstan Respýblıkasy Qylmystyq Kodeksiniń 188-baby 2-bóligi boıynsha qylmystyq is qozǵaldy. Kúdiktiler qamaýǵa alyndy.
