Qyzylordada 6 aıda ana ólimi tirkelgen joq
QYZYLORDA. QazAqparat - Bıylǵy jyldyń 6 aıynda oblysta bala óliminiń kórsetkishi 53,5%-ǵa tómendedi, al ana ólimi birde-bir ret tirkelgen joq. Bul týraly oblystyń bas dárigeri Aqmaral Álnazarova jergilikti BAQ ókilderimen kezdesýde málimdedi, dep habarlady QazAqparat.
Óńirde bala ólimi kórsetkishin tómendetý maqsatynda oblystyq balalar aýrýhanasy janynan ashylǵan neonataldy hırýrgııa bólimshesine jergilikti bıýdjetten bólingen 42 mln teńgege medıtsınalyq-qural jabdyqtar satyp alynǵan.
«Aǵymdaǵy jyldyń 6 aıynda alǵash ret óńirde keýde kletkasynyń deformatsııasyna, julyn-mı jaryǵy, jaıylǵan perıtonıtke, bas súıegi defekttisine, gıdrotsefalııamen týylǵan 21 nárestege ota jasalyndy», - dedi Aqmaral Álnazarova.
Sonymen qatar ol oblysta 0-5 jastaǵy balalardyń aýrýshańdyǵyn tómendetý, ólim-jitimdi boldyrmaý jáne balalardyń fızıkalyq-psıhıkalyq jetilýin jaqsartýǵa múmkindik týǵyzatyn «Tıimdi tehnologııalar trenıngtik ortalyǵy» ashylǵandyǵyn atap ótti.
«Ortalyqqa jergilikti bıýdjetten 7 mln 500 myń tenge bólinip, 1077 medıtsına qyzmetkerleri balalyq shaǵyndaǵy aýrýlardy yqpaldastyra emdeý baǵdarlamasymen oqytyldy», - dedi aımaqtyń bas dárigeri.
Onyń aıtýynsha, bul medıtsına qyzmetkeriniń bala kútime baılanysty biliktiligin arttyryp, aýyrýdy erte anyqtaýǵa múmkindik beredi.
