Qyzylordada 6,4 shaqyrym eki jolaqty jylý jelileri qaıta jańǵyrtyldy

QYZYLORDA. QazAqparat - Búgin oblys ákiminiń tóraǵalyǵymen jylý berý jónindegi shtab otyrysy ótti. Onda aımaqtaǵy jylý berý maýsymyna daıyndyq sharalary pysyqtaldy. Bul týraly «QazAqparat» HAA tilshisi oblystyq ákimdiktiń baspasóz qyzmetine silteme jasaı otyryp habarlaıdy.

«Nurly jol» baǵdarlamasy boıynsha Qyzylorda qalasynyń 6,4 shaqyrymdyq eki jolaqty jylý jelilerin qaıta jańǵyrtýǵa Ulttyq qordan 997,2 mln teńge bólindi. Búgingi tańda qurylys-montaj jumystary tolyq aıaqtalyp, bólingen qarjy jergilikti atqarýshy organ tarapynan tolyq ıgerildi. Al tabıǵı monopolııa sýbektisi tarapynan (QJEO) ıgerilý kórsetkishi - 95 paıyz. Bul merdigerlerdiń atqarylǵan jumystar aktisin usynýyna baılanysty bolyp otyr.

Munymen qosa, Eýropalyq Qaıta qurý jáne damý bankimen (EQQDB) birlesip, «Qyzylorda qalasynyń jylý júıelerin salý jáne jańǵyrtý» jobasy boıynsha 5 ishki joba naqtylandy. Olar 2015-2017 jyldary aralyǵynda tolyqtaı júzege asyrylady.

Áleýmettik nysandar men kópqabatty turǵyn úıler boıynsha Qyzylorda oblysynda 1 177 áleýmettik nysan, onyń ishinde, 464 bilim, 377 mádenıet, 336 densaýlyq saqtaý nysandarynda jáne ondaǵy 552 kishi qazandyqtardyń barlyǵyna jóndeý jumystary júrgizildi.

Oblys boıynsha ortalyqtandyrylǵan jylý júıesine qosylǵan 647 kópqabatty turǵyn úı bar. Olardyń jylý qazandyqtaryna tolyqtaı jóndeý jumystary júrgizilgen.