Qyzylordada 6,3 mlrd teńgege modýldik aýrýhana salynyp jatyr
Syr óńirinde búgingi kúnge deıin 3 290 adamnan koronavırýs ınfektsııasy anyqtaldy. Tamyz jáne qyrkúıek aılarynda qaterli indet juqtyrǵandar sany birshama tómendegen edi. Sońǵy eki aıda olardyń sany qaıtadan kóbeıýde. Atap aıtqanda, qazan aıynda 20 jaǵdaı anyqtalsa, qarasha aıynda 28 jaǵdaı tirkeldi.
«Búgingi kúnderi oblysta barlyǵy 210 ınfektsııalyq tósek-oryn bar, Júkteme 5,2% qurap otyr. Jansaqtaý bóliminde em alyp jatqan naýqas joq. Koronavırýs ınfektsııasy jáne vırýsty pnevmonııa juqtyrǵan 526 medıtsına mamanynyń qujattary «MapCOVID» aqparattyq júıesine engizilip, olardyń barlyǵyna tólem taǵaıyndaldy. Jyl basynda atalǵan salada quraldarmen jabdyqtalý 85% bolsa, 10 aı qorytyndysymen ol 88,5%-ǵa kóterildi. Infektsııalyq statsıonarlardyń reanımatsııa bólimin jabdyqtaý kórsetkishi de ósti. Aıta keterligi, oblysta ınfektsııalyq statsıonardyń anestezıologııalyq jáne reanımatsııalyq 38 tósek-orny bar. Qazir jansaqtaý bóliminde em alyp jatqan naýqas joq», - dedi oblys ákiminiń orynbasary Naýryzbaı Baıqadamov óńirlik kommýnıkatsııalar qyzmetinde ótken brıfıngide.
Epıdmaýsym bastalǵanda aımaqta barlyǵy 76 ókpeni jasandy jeldetý apparaty bar edi. Qazir olardyń sany 244-ke jetti. Aldaǵy ýaqytta qosymsha taǵy 7 apparat keledi.
Ahýal kúrdelengen jaǵdaıda qala men aýdandarda 3 000 tósek-oryn uıymdastyrýǵa múmkindik bar. Búginde jalpy quny 6,3 mlrd teńgeni quraıtyn modýldik aýrýhana salynyp jatyr. Ol tósek oryn sanyn 200-ge arttyrýǵa múmkindik týǵyzady.
Oblys boıynsha 79 jedel járdem brıgadasy halyqqa qyzmet kórsetedi. Qosymsha lızıng arqyly 40 sanıtarlyq avtokólik qarasha aıynda jetkizildi. Buǵan qosa, 161 mobıldi brıgada qurylǵan. Onyń 138-i qazir qyzmet kórsetýde.
Sondaı-aq, Qyzylorda oblysynda 3 600 medıtsına qyzmetkeri rezervke alyndy.