Qyzylordada 56 bas iri qarany urlaǵan barymtashylar qolǵa tústi
QYZYLORDA. QazAqparat - Bıylǵy jyldyń basynda Jańaqorǵan aýdandyq ishki ister bólimine Qojakent aýylynyń 53 jastaǵy turǵyny aryzdanyp, aýyldan 3 shaqyrym jerde jaıylyp júrgen 3 bas sıyry urlanǵandyǵyn habarlaǵan bolatyn.
Atalǵan aryz negizinde jedel-izdestirý toby qurylyp, izdestirý sharalary barysynda sáýir aıynda «barymtashylyq jasady» degen kúdikpen 50 jastaǵy, 45 jastaǵy jáne 34 jastaǵy 3 er adam ustalyp, aýdandyq ishki ister bóliminiń ýaqytsha ustaý oqshaýlaǵyshyna qamaldy, dep habarlady QazAqparat HAA tilshisi oblystyq ІІD silteme jasap.
Sotqa deıingi tergeý barysynda ustalǵan tulǵalardyń óńirde oryn alǵan 14 mal urlyǵy qylmysyna qatysy bar ekendigi jáne barlyǵy 56 iri qara maldyń qoldy bolǵandyǵy anyqtaldy.
Atalǵan derek boıynsha Qazaqstan Respýblıkasy Qylmystyq kodeksiniń 188-baby 4-bóligi negizinde qylmystyq is qozǵalyp, sotqa deıingi tergep-tekserý amaldary júrgizilýde.
