Qyzylordada 54 myńnan astam kásipkerge salyqtyq jeńildik jasaldy

NUR-SULTAN. QazAqparat - Qyzylorda oblysynda bıznesti qoldaý úshin 54 myńnan astam kásipkerge salyqtyq jeńildik jasaldy, dep habarlaıdy QazAqparat tilshisi.

Oǵan qosa óńirdegi 8 myńnan astam kásipker mindetti áleýmettik-medıtsınalyq saqtandyrý tóleminen bosatylǵan.

Jyl sońyna deıin 194 shaǵyn jáne orta bıznes sýbektisi jaldaý aqysynan tólemeıdi.

Sondaı-aq, shamamen 9 myńǵa jýyq shaǵyn jáne orta bıznes sýbektisi boıynsha 11 mlrd teńgeden astam somany quraıtyn qaryz tólemi keıinge qaldyrylyp, qaıta qurylymdaldy.

Qyzylorda oblysynda meıramhana bıznesimen 128 nysan aınalysady. Qazir olardyń kópshiligi meıramhana turaqsyz bıznes ekenin túsindi.

Sol sebepti resýrstar men energııany turaqty tabys ákeletin arnaǵa aýystyrýda.

«Máselen, óńirdegi 10 toıhana qyzmetin basqa salaǵa baǵyttady. Biri balalar oıyn alańy men kondıterlik ónimder óndiretin tsehyna aýystyryp jatyr. Sonymen birge sýsyndar jáne lavash shyǵarý óndiristerin iske asyrmaq. Biz bul baǵyttaǵy jumystardy basqa da kásipkerlermen de jalǵastyrýdamyz», - dedi oblys ákimi Gúlshara Ábdiqalyqova elordadaǵy Ortalyq kommýnıkatsııalar alańynda ótip jatqan brıfıngte.

Aıta keteıik, Qyzylordada agrarlyq salada eksportqa shyqqan taýardyń 98 paıyzy - qaıta óńdelgen ónimder.

Sondaı-aq, Qyzylordada balyq sharýashylyǵyn damytý úshin arnaıy baǵdarlama jasaldy.