Qyzylordada 5 mln teńgeni urlaǵan turǵyn sottaldy
QYZYLORDA. QazAqparat - Jergilikti azamattyń úıinen qomaqty qarjyny qoldy etken Qyzylorda qalasynyń turǵynyna qatysty sot úkimi shyqty, dep habarlaıdy QazAqparat tilshisi.
Atalmysh oqıǵa 2018 jyldyń 28 qyrkúıek kúni oryn aldy. Bul kúni ol betperde kıip, belgisiz azamattyń úıine kiredi. Sol úıde turatyn jábirlenýshi azamattyń basyn kirpishpen uryp, qolyn baılap tastaıdy. Seıften 5 mln teńgeni alyp, boı tasalaıdy. Aqshasynan aırylyp qalǵan qala turǵyny polıtsııaǵa shaǵymdandy.
«Oryn alǵan derek boıynsha Qazaqstan Respýblıkasy Qylmystyq Kodeksiniń 192-babynyń 3-bóligimen sotqa deıingi tergep-tekserý amaldary júrgizildi. Tergeý barysynda jedel ýákilder, krımınalıst jáne tergeýshiniń kásibı biliktiliginiń nátıjesinde kúdiktiniń qylmystyq is-áreketi tolyq dáleldendi. Mamandardyń birlesken júıeli jumysy osylaısha oń nátıje berdi. Kúdiktiniń qylmystyq is-áreketi arnaıy sot saraptamalarmen, zertteý qorytyndylarymen tolyq dáleldendi. Nátıjesinde is aıyptaý qorytyndysymen sotqa joldandy», - dep jazylǵan Qyzylorda oblystyq polıtsııa departamentiniń baspasóz qyzmeti taratqan habarlamada.
Sot protsesinde kúdikti ózi jasaǵan qylmystyq is áreketin moıyndady. Keltirilgen shyǵyndy jábirlenýshige tolyǵymen óndirdi. Ol sot úkimimen 10 jylǵa bas bostandyǵynan aıryldy.
Sondaı-aq, budan buryn Qyzylordada 26 jastaǵy azamatsha alaıaqtyqpen 80 mln teńgeni qaltaǵa basqanyn habarlaǵan edik.
