Qyzylordada 46 adam koronavırýs juqtyrǵan aýyldaǵy blokposty alyp tastaýǵa áli erte - ákimdik

QYZYLORDA. QazAqparat - Qyzylorda oblysy Shıeli aýdanyna qarasty Tóńkeris aýyldyq okrýginde blokposty alyp tastaýǵa áli erte. Bul jóninde oblys ákiminiń orynbasary Naýryzbaı Baıqadamov málim etti, dep habarlaıdy QazAqparat tilshisi.

Búginge deıin Shıeli aýdanynda 66 naýqas tirkelgen. Onyń 46-y Tóńkeris aýyldyq okrýginiń turǵyndary. Aýylda vırýs qaýpi áli de seıile qoıǵan joq. Sondyqtan kire beris blok -postty alyp tastaýǵa áli erte.

«Tóńkeris aýyly turǵyndarynyń 1,4 paıyzy koronavırýs ınfektsııasyn juqtyrǵan. Eki-úsh kún buryn keıbir respýblıkalyq telearnalarda Tóńkeris aýyldyq okrýginiń turǵyndarynyń tótenshe jaǵdaıǵa baılanysty qoıylǵan blokpost jumysyn toqtatý týraly talaby kórsetildi. Onda suhbat bergen turǵyndar aýylda azyq-túlik baǵasy kóterilgenin, karantın talabyna sáıkes aýyldan shyǵa almaı qalǵandyǵyn aıtqan. Qazir aýyldyq okrýg turǵyndarynyń suranysy boıynsha azyq-túlik taýarlary, 300 gaz ballony, 20 tonna jem kidirissiz jetkizildi. Azyq-túlik satatyn kásipkerlerge arnaıy hat berildi. Onda shekti baǵanyń turaqtylyǵyn saqtaý tapsyryldy. Ol jergilikti bılik ókilderi, qoǵamdyq uıymdar tarapynan baqylandy. Kúndelikti qoldanystaǵy 9 azyq-túlik taýarynyń belgilengen baǵasy ósken joq. Halyq tutynatyn taýarlardyń baǵasyna tek jol shyǵyny ǵana qosyldy», - dedi oblys ákiminiń orynbasary Naýryzbaı Baıqadamov.

Tóńkeris aýyldyq okrýginiń kire beris blokposty 30 naýryzda qoıylǵan. Oblys ákimi orynbasarynyń aıtýynsha, karantındik shekteýler epıdemıologııalyq jaǵdaıǵa sáıkes birtindep alynady.

Qazir Qyzylorda oblysynda koronavırýs ınfektsııasy dıagnozy qoıylǵan 232 adam bar . Onyń 188-i syrqatynan aıyǵyp shyqty.