Qyzylordada 45 jastaǵy turǵyn Syrdarııaǵa batyp ketti

QYZYLORDA. QazAqparat - Qyzylorda qalasynda 45 jastaǵy azamat Syrdarııa ózeniniń şomylýǵa tyıym salynǵan tusynda sýǵa batyp ketti, dep habarlaıdy QazAqparat tilshisi.

Bul oqıǵa 14 maýsymda saǵat 20.30 shamasynda oryn aldy. Jergilikti 112 qutqarý qyzmetine «Araı» shaǵyn aýdany tusyndaǵy darııa aýmaǵynda 45 jastaǵy azamattyń sýǵa batyp ketkeni jóninde habar kelip túsken.

«Órt sóndirý qyzmetiniń jedel-qutqarý jasaq qutqarýshylary oqıǵa ornyna jedel jetti. Qutqarýshylar sýǵa batyp ketken azamatty sý astynan izdestirý jumystaryn júrgizdi. Deneni sý astynan saǵat 20.38-de jaǵaǵa shyǵaryldy», - dep málim etti Qyzylorda oblystyq Tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz mamany Álııa Erejepova.

Málim bolǵanyndaı, sýǵa batyp ketken azamat mas bolǵan.