Qyzylordada 425 qoıy bar otbasy áleýmettik kómek alǵan
Tıisti sala mamandarynyń tekserýi nátıjesinde 1597 otbasyna 1 mlrd 71 mln teńge áleýmettik kómek taǵaıyndaý toqtatyldy. Artyq tólengen 229 mln teńge bıýdjetke qaıtarylǵan. Ataýly kómek alýshylar sany Qyzylorda qalasynda – 4,5, Jańaqorǵanda – 3,8, Shıelide – 3,5 esege artqan.
«Bul ataýly áleýmettik kómektiń retsiz taǵaıyndalǵanyn kórsetedi. Tekserý barysynda kóptegen olqylyqtar anyqtaldy. Osyndaı kómekke ıe bolǵandar qatarynda 425 qoıy, 19 túıesi bar otbasylar kezdesti. Sondaı-aq, taǵy birinde 41 túıe, 47 jylqy bar ekeni belgili boldy. Jalpy, memleket kómegin shyn muqtaj adamdar alýy tıis. Ataýly áleýmettik kómekti alý úshin ádeıi ajyrasý, jumystan erikti túrde shyǵý, tabysty jasyrý sııaqty áreketterge baratyn adamdar kezdesedi», - dedi Qyzylorda oblysynyń ákimi Qýanyshbek Ysqaqov «Nur Otan» partııasy oblystyq fılıaly saıası keńesi bıýrosynyń keńeıtilgen otyrysynda.
Qazirgi tańda Qyzylorda oblysynda árbir otbasyna 84 myń teńgeden joǵary ataýly áleýmettik kómek beriledi. Bıylǵy jyldyń 1 qazanyndaǵy málimet boıynsha mundaı kómekti 147 myńnan astam turǵyn alǵan.
