Qyzylordada 418 myńnan astam adam koronavırýsqa qarsy vaktsına saldyrdy
QYZYLORDA. QazAqparat - Qyzylorda oblysynda ekpe alǵan adamdar arasynda koronavırýs ınfektsııasyna shaldyǵý kórsetkishi nebári 0,4 paıyzdy quraıdy, dep habarlaıdy QazAqparat tilshisi.
Oblysta koronavırýsqa qarsy vaktsınanyń birinshi komponentimen egilgender sany - 418 748 adam, ol halyqtyń 92,5 paıyzy. Al ekinshi komponentpen – 395 391 adam (87,4 paıyz) qamtyldy.
«Epıdemıologııalyq taldaýlar kórsetkendeı, ekpe alǵan adamdar arasynda koronavırýs ınfektsııasyna shaldyǵý kórsetkishi nebári 0,4%-dy quraıdy. Al naýqastanǵandardyń 99,6% koronavırýsqa qarsy vaktsına almaǵan adamdar arasynan anyqtalyp otyr. Bul óz kezeginde ekpeniń joǵary tıimdiligin kórsetedi. Koronavırýs ınfektsııasynyń qarqyndy taralýynyń negizgi sebebi - turǵyndar tarapynan mereke kúnderi sanıtarııalyq-epıdemıologııalyq talaptardy oryndaýdyń buzylýy, sonymen qatar aınalymda «Omıkron» shtamynyń bolýy yqtımal degen boljam bar. Sondyqtan zerthanalyq jolmen tolyq genomdy sekvınerleý júrgizý úshin Nur-Sultan qalasyna iriktep alynǵan úlgiler jóneltilgen. Nátıjesi qosymsha habarlanady», - dedi Qyzylorda oblysynyń sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Aıta ketsek, óńirde «Pfizer» vaktsınasyn 19 865 adam ektirdi. Onyń ishinde 16 210-y jasóspirim, 1541-i júkti áıel, 2114-i emizýli ana.
«Búginge deıin 35 276 óńir halqy revaktsınatsııadan ótti. Onyń ishinde 425 turǵyn «Pfizer» vaktsınasyn aldy. Qazirgi tańda oblys boıynsha 20 medıtsınalyq mekemede egý jumystary úzilissiz júrgizilýde», - dedi oblystyq densaýlyq saqtaý basqarmasy basshysynyń orynbasary Jangeldi Shaımbetov.
Qyzylorda oblysynyń epıdemıologııalyq jaǵdaıy turaqsyz. Jyl basynan beri koronavırýs ınfektsııasyn juqtyrýdyń 2 622 jaǵdaıy anyqtalǵan. Bul ótken jylǵy jeltoqsanda tirkelgen kórsetkishten 22 esege joǵary.
Eske salsaq, ótken táýlikte Qyzylordada koronavırýs juqtyrýdyń eń joǵary kórsetkishi tirkeldi.
