Qyzylordada 4014 adam koronavırýs ınfektsııasyna qarsy vaktsına qabyldady
QYZYLORDA. QazAqparat - Qyzylorda oblysynda búgingi kúnge deıin 4014 adam koronavırýs ınfektsııasyna qarsy vaktsına qabyldady, dep habarlaıdy QazAqparat tilshisi.
Qyzylorda oblysynda qaterli indetke qarsy ekpe qabyldaý sharasy 1 aqpannan bastalǵan bolatyn. Sol ýaqyttan beri 4014 adam ekpe qabyldaýǵa nıet bildirdi. Olardyń arasynda 22 aqpan-26 naýryz aralyǵynda 1275 adam vaktsına saldyrdy.
Búginde oblystaǵy barlyq aýdanda reseılik «Spýtnık V» vaktsınasynyń alǵashqy dozalary salynýda. Qaýipti keselge qarsy ekpe saldyrǵandar qatarynda Jalaǵash jáne Qarmaqshy aýdandarynyń turǵyndary da bar.
Eki aýdannyń árqaısysyna vaktsınanyń 100 dozasy jetkizilgen. Ekpe saldyrǵan adamdardyń basym bóligin medıtsına salasynyń qyzmetkerleri quraıdy.
«Aýdanda ekpe salý erikti túrde júrgizilýde. Birinshi kezekte medıtsına qyzmetkerleri, muǵalim, memlekettik qyzmetkerler jáne aýdan turǵyndary qabyldaıdy. Ekpe salynǵan patsıentterdiń jaǵdaılary qanaǵattanarlyq. Janama áserler baıqalmady. Vaktsınatsııalaýdyń ekinshi kezeńinde 3300 doza keledi», - dedi Jalaǵash aýdanaralyq aýrýhanasynyń bas dárigeriniń mindetin atqarýshy Amankúl Mahanbetova.
Al Qarmaqshy aýdanynda ekpe egý jumystary 9-15 naýryz júrgizildi. Aýdan boıynsha 100 adamǵa egildi.
Onyń ishinde 94-i birinshi bolyp juqpaly aýrýlar, jedel medıtsınalyq kómek, reanımatsııa, qabyldaý bólimshesiniń medıtsına qyzmetkerlerine salyndy. Aldaǵy ýaqytta 320 dana «Spýtnık-V» vaktsınasy kútilýde. Endi jospar boıynsha muǵalimder qamtylady. Men ózim de koronavırýs ınfektsııasyna qarsy ekpeni saldyrdym. Eshqandaı keri áser bolǵan joq. Barsha halyqty bul indetti joıý úshin vaktsınatsııalaýǵa shaqyramyn», - dedi Qarmaqshy aýdanaralyq aýrýhanasynyń bas dárigeri Baqytjan Nysanbaev.
Budan buryn Aral, Qazaly aýdandary turǵyndary koronavırýs vaktsınasyn ala bastaǵanyn habarlaǵan edik.
