Qyzylordada 400 oryndyq emhana paıdalanýǵa berildi
QYZYLORDA. QazAqparat - Táýelsizdik kúni merekesine oraı Qyzylordada memlekettik-jeke menshik áriptestik aıasynda salynǵan 400 oryndyq emhana paıdalanýǵa berildi, - dep habarlady QazAqparat tilshisi.
Bul memlekettik-jekemenshik áriptestik nátıjesinde júzege asqan respýblıkadaǵy alǵashqy joba.
Emhananyń ashylý saltanatynda Qyzylorda oblysynyń ákimi Qyrymbek Kósherbaev turǵyndardy merekemen jáne jańa nysannyń ashylýymen quttyqtady.
«Sońǵy eki jylda aımaqtaǵy medıtsınalyq uıymdardyń materıaldyq-tehnıkalyq bazasy nyǵaıdy. Oblystyń barlyq aýdandarynda 250 kelýshige arnalǵan emhanalar men 11 medıtsınalyq beket salynǵan. Eki jylda medıtsınalyq jabdyq satyp alý úshin 3,1 mlrd. teńge bólindi, onyń ishinde ana men balanyń densaýlyǵyn nyǵaıtýǵa arnalǵan zamanaýı jabdyqtar satyp alyndy. Máselen, ota jasaýǵa arnalǵan quny 600 mıllıon teńgeden asatyn mobıldik qondyrǵy álemdegi kez kelgen klınıkamen baılanysýǵa múmkindik beredi. Mundaı qondyrǵy respýblıkadaǵy 5 klınıkada ǵana bar», - dedi oblys basshysy.
Emhana ashylýyna QR Densaýlyq saqtaý vıtse-mınıstri Alekseı Tsoı qatysty.
«Elbasy «Ult josparynda» kórsetken 100 naqty qadamnyń biri - jekemenshik medıtsına salasyn damytý. Qazirgi tańda elimizde memlekettik-jekemenshik áriptestik aıasynda 110 joba, onyń ishinde 3 respýblıkalyq jáne 107 jergilikti joba júzege asyrylýda. Jalpyulttyq mereke - Táýelsizdik kúni qarsańynda Qyzylordada memlekettik-jekemenshik áriptestik aıasynda salynǵan emhananyń ashylýy, árıne, biz úshin úlken qýanysh», - dedi A.Tsoı.
Jańa klınıka oblys ortalyǵynyń 46 myń turǵynyna qyzmet kórsetetin bolady. Ǵımaratta balalar men eresekterge arnalǵan bólimder, fýnktsıonaldy dıagnostıkalyq bólim, zerthana, 10 tósektik kúndizgi statsıonar jáne qosalqy bólmeler bar. Nysan «ALEXEY SULTAN AKHMED» JShS jeke ınvestor jáne kepildendirilgen tegin medıtsınalyq kómekke tapsyrys aıasynda bıýdjet qarjylary esebinen salyndy.
Sondaı-aq, Jańaqorǵan jáne Qazaly aýdandarynyń ortalyq aýrýhanalary birneshe kún ishinde paıdalanýǵa beriletinin atap óteıik.
