Qyzylordada 4 kıik atyp alǵan brakonerler ustaldy
QR Іshki ister mınıstrligi Baıqońyr qalasyndaǵy ókildiginiń qyzmetkerleri kezekti reıd júrgizgen edi. Atalmysh shara barysynda polıtseıler Tóretam kentinde «Land Cruiser 80» kóligin toqtatty. Tekserý barysynda kóliktiń júk salǵyshynan 4 kıik, 2 ashana pyshaǵy, 12 kalıbrli myltyq pen 9 oq tárkilendi. Kólik ıesi men ondaǵy azamattar Baıqońyr qalasy men Tóretam kentiniń turǵyndary bolyp shyqty.
«Ustalǵan adamdardyń biri ýaqytsha ustaý ızolıatoryna qamaýǵa alyndy. Qalǵanyna bultartpaý sharasyn qoldaný máselesi qaralyp jatyr. Osy derek boıynsha QR Qylmystyq kodeksiniń 339-baby 2-bóliginiń 2-tarmaǵy boıynsha sotqa deıingi tergep-tekserý jumystary júrgizilýde. Onda ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý jaǵdaıy kórsetilgen», - dep málim etti Qyzylorda oblystyq polıtsııa departamentiniń baspasóz qyzmeti.