Qyzylordada 4 adamnyń ómirin qıǵan jol apatynyń alǵashqy derekteri belgili boldy
QYZYLORDA. QazAqparat - Qyzylordada 4 adamnyń ómirin qıyp ketken jol apatyna qatysty jańa derekter paıda boldy, dep habarlaıdy QazAqparat tilshisi.
Aıta keteıik, buǵan de ıin Qyzylordada júk kóligi men jeńil kóliktiń soqtyǵysqany týraly habarlaǵanbyz. Oqıǵa 1 qazan kúni saǵat 18-00-der shamasynda Sultan Beıbarys kóshesi men áýejaı trassasy qıylysynda bolǵan. Onyń saldarynan 4 adamnyń ómiri qıyldy.
«Oqıǵa barysyna toqtalatyn bolsaq, «VAZ-2115» avtokóligi áýejaı baǵytymen kele jatyp Sultan Beıbarys kóshesi men áýejaı trassasy aýmaǵynda «Batys Qytaı-Batys Eýropa» tasjolynan Qyzylordaǵa qaraı bet túzep kele jatqan «SNACMAN» júk kóligi jáne «Opel-Vektra» avtokólikterimen soqtyǵysqan. Oqıǵanyń saldarynan «VAZ-2115» kóliginiń júrgizýshisi men ondaǵy eki jolaýshy sol jerde qaıtys bolǵan. Osy avtokólikte kele jatqan taǵy eki jolaýshy oblystyq medıtsına ortalyǵyna jetkizilip, bireýi sol medıtsınalyq mekemede kóz jumdy. Al «Opel-Vektra» avtokóligindegi 4 jolaýshy oblystyq medıtsına ortalyǵynyń qabyldaý bóliminde dárigerler qaraýynda bolyp, kóp uzamaı úılerine qaıtaryldy», - dedi Qyzylorda oblystyq ishki ister departamenti Jergilikti polıtsııa qyzmetiniń bastyǵy Baýyrjan Ibraev.
Qaıtys bolǵan adamdardyń 3-ýi er azamat bolsa, 1-ýi áıel. Olar jergilikti áskerı bólimde qyzmet etedi.
«Qaıtys bolǵan adamdar 25-30 jastaǵy azamattar. Qalǵan derekter tergeý barysynda anyqtalatyn bolady», - dedi oblystyq ishki ister departamenti anyqtaý basqarmasynyń bastyǵy Ámirjan Ótegenov.
Tártip saqshylarynyń aıtýynsha, jol apaty bolǵan Sultan Beıbarys kóshesi men áýejaı trassasy qıylysy qaýipti aımaq qataryna sanalmaıdy. Buǵan deıin bul mańda mundaı oqıǵalar oryn almaǵan. Búginde qıylysqa baǵdarsham ornatý máselesi tarazylanyp jatyr. Ol úshin polıtsııa qyzmetkerleri men qalanyń jaýapty sala mamandarynyń ortaq sheshimi bolýy tıis.
Qazirgi tańda bul oqıǵa boıynsha tıisti saraptamalar taǵaıyndaldy. Oqıǵanyń basqa da mán-jaıy anyqtalýda.
