Qyzylordada 3500 orynǵa arnalǵan jabyq fýtbol alańy salynady
QYZYLORDA. QazAqparat - 2019 jyly Qyzylorda qalasynyń sol jaǵalaýynda 3500 orynǵa arnalǵan jabyq fýtbol alańynyń qurylysy bastalady, dep habarlaıdy QazAqparat tilshisi.
Qyzylorda oblysynyń ákimi Qyrymbek Kósherbaev «Qaısar» fýtbol klýby basshylyǵy jáne oıynshylarmen kezdesýinde osy jaǵymdy jańalyqty jetkizdi.
Aımaq basshysy fýtbolshylar jattyǵýyn tamashalap, olarmen oı-pikir bólisti. Kezdesý barysynda aımaq basshysy fýtbolshylarǵa jańa jeńis tiledi.
«Qazir stadıondy qaıta jańǵyrtý sapa standarty talaptaryna saı óz deńgeıinde júrgizilýde. Sondaı-aq, kelesi jyly sol jaǵalaýda 3500 orynǵa arnalǵan jabyq alańnyń qurylysy bastalady», - dedi aımaq basshysy.
Eske sala keteıik, «Qaısar» komandasy búginde el birinshiliginde sońǵy aınalym oıyndaryn ótkizip keledi. Sońǵy týrda óz alańynda qaraǵandylyq «Shahterden» basym tústi. Qorytyndy 3 aınalym boıynsha búginde 4 match ótkizip, oıynshylar 7 upaıǵa ıe boldy. Alda taǵy 7 oıyn bar. Týrnır kestesinde «Qaısar» jetinshi orynda tur. Fýtbol maýsymy ashylar tusta oblys ákimi olardyń aldyna el birinshiliginde keminde besinshi oryn alý mindetin júktegen edi.
Bıyl «Qaısar» klýbynyń qurylǵanyna 50 jyl tolady. Komanda 1968 jyly alǵashqy resmı oıynyn ótkizgen edi.
