Qyzylordada 340 adam vaktsına saldyrdy

QYZYLORDA. QazAqparat - Qyzylordada 3 kúnde 340 adam vaktsına saldyrdy, dep habarlaıdy QazAqparat tilshisi.

Búginde koronavırýs ınfektsııasyna qarsy ekpe jasaý jumystary qarqyndy júrýde. Bıylǵy jyldyń 1 aqpanynan bastap úsh kún ishinde 340 adam vaktsına saldyrǵan. Onyń ishinde 320-sy medıtsına qyzmetkeri bolsa, qalǵany - ekpe saldyrýǵa nıet bildirgen turǵyndar.

Qaladaǵy №6 qalalyq emhananyń aǵa meıirbıkesi Lázzat Baıtabynova erikti túrde ekpe alǵandardyń biri. Vaktsına saldyrǵannan keıin densaýlyǵymda esh ózgeris bolǵan joq deıdi ol.

«Turǵyndarmen jıi qatynasta bolamyz. Medıtsına qyzmetkerleriniń vırýs juqtyrý qaýpi óte joǵary. Sondyqtan árbir dáriger jáne azamattar ekpe saldyrǵany durys dep esepteımin. Qazirgi tańda osy ekpeniń arqasynda kóptegen derttiń aldyn alýǵa bolady. Ekpe saldyrǵaly beri densaýlyǵymda esh ózgeris oryn ala qoıǵan joq. Sondyqtan ózge azamattardy da vaktsına alýǵa shaqyramyn», - deıdi Lázzat Baıtabynova.

Óńirge «Spýtnık V» reseılik vaktsınasynyń 1000 dozasy jetkizildi. Qalǵany kezeń-kezeńimen keletin bolady. Bul jumystarǵa qazir №1, №3 jáne №6 qalalyq emhanalardan 3 egý kabınetteri daıyndalǵan. Ekpe jumystaryn júrgizýge oblys boıynsha barlyǵy 133 meıirbıke, 89 dýbler tartylǵan.

Esterińizge sala ketelik, budan buryn Qyzylorda oblysynda birqatar basshy azamattar koronavırýske qarsy vaktsına saldyrdy.