Qyzylordada 3250 tonnaǵa arnalǵan kókónis qoımasy ashylady
QYZYLORDA. 10 qańtar. QazAqparat /Jańagúl Serdaly/ - Qyzylordadaǵy «Altyn qamba» agroónerkásip kombınaty» jaýapkershiligi shekteýli seriktestiginiń jalpy syıymdylyǵy 3250 tonnalyq jańa qoımanyń paıdalanýǵa beriletin shaǵy taıaý.
Bul týraly oblystyq ishki saıasat basqarmasynyń baspasóz qyzmeti habarlady.
Jobanyń negizgi maqsaty «Altyn qamba» AÓK» JShS bazasynda kókónis ónimderin saqtaý jáne ótkizýmen aınalysatyn, jańa qondyrǵylarmen jabdyqtalǵan jáne ozyq tehnologııalarmen qamtamasyz etilgen qoımasy bar saýda-logıstıkalyq ortalyǵyn uıymdastyrý bolyp tabylady.
Onyń jalpy quny 747 152,0 myń teńgeni quraıdy. Onyń ishinde 245,0 mln. teńge ǵımarat qurylysy, elektr jelisi t.b., 98,0 mln. teńgege tehnologııalyq jabdyqtar da bar.
Jobany júzege asyrýda «Altyn qamba» AÓK» JShS-niń qarjylary, «Qyzylorda qarjy kompanııasy» JShS arqyly tıisti jabdyqtar, «Ońtústik qarjy kompanııasy» JShS arqyly avtokólikter lızıngige alynyp berildi.
«Ońtústik qarjy kompanııasy» JShS-niń lızıngtik baǵdarlamasy negizinde «Altyn qamba» AÓK» JShS-ine 10 «DAF» refrıjeratory jáne 3 «KAMAZ» avtokólikteri alynyp berildi.
Qazirgi tańǵa kókónis saqtaý qoımasynyń qurylys jumystary tolyq aıaqtalyp, gollandııalyq (Tolsma) zamanaýı jabdyqtar ornatyldy. Saqtaý qoımasy kartop, pııaz, sábiz sekildi ónimderdi saqtaýdyń jeldetkishi, býlanýǵa qarsy, ylǵaldylyqty baqylaý júıeleri, konteınerlerdi tıeý jáne túsirý máshıneleri, elektrqozǵaltqyshtarmen jabdyqtalǵan.
Kompıýterlik jabdyqtarmen qamtamasyz etilgen avtokólik tarazysy salynyp, temir jol tarazysy men temir joldy, transformatorlyq podstantsııany jóndeý jumystary júrgizildi.
