Qyzylordada 3-synyp oqýshysyn zorlaǵan kúdikti ustaldy
QYZYLORDA. QazAqparat - Qyzylorda qalasyndaǵy saıajaılardyń birinde 3 synyp oqıtyn qyzdy zorlap, ony qorǵaýǵa umtylǵan anasyn óltirip ketken kúdikti ustalyp, ýaqytsha ustaý abaqtysyna qamaldy, dep habarlaıdy QazAqparat tilshisi oblystyq ІІD baspasóz qyzmetine silteme jasap. Bul oqıǵa oblys ortalyǵyndaǵy saıajaı aımaǵynyń birinde oryn alǵan.
«Qazir oryn alǵan oqıǵaǵa baılanysty Qazaqstan Respýblıkasy Qylmystyq kodeksiniń 120-baby 4-bóligimen jáne 99-babynyń 2-bóligimen sotqa deıingi tergep-tekserý bastaldy. Osy qylmysty jasady degen kúdikpen Qyzylorda qalasynyń turǵyny ustalyp, ýaqytsha ustaý abaqtysyna qamaldy. Qalǵan málimetter Qazaqstan Respýblıkasy qylmystyq-protsestik kodeksiniń 201-babynyń talaptaryna sáıkes, tergeý qupııalyǵyna baılanysty jarııa etilmeıdi», - dep jazylǵan oblystyq ІІD baspasóz qyzmetiniń habarlamasynda.
Oblystyq balalar aýrýhanasynyń bólim basshysy Álimjan Tólegenovtiń aıtýynsha, qazir qyz balanyń jaǵdaıy birqalypty. Aýrýhanaǵa alǵash kelgen sátte jaǵdaıy aýyr bolatyn. Dereý jansaqtaý bólimine jatqyzylǵan qyz balaǵa ota jasalǵan. Qazir onyń densaýlyǵyna eshqandaı qaýip joq. Jábirlenýshi psıholog mamandardyń baqylaýynda. Onyń qasynda Aqtóbeden kelgen ájesi, Astanaǵa tabys tabýǵa ketken ákesi bar.
