Qyzylordada 26 jastaǵy azamatsha alaıaqtyqpen 80 mln teńgeni qaltaǵa basqan
QYZYLORDA. QazAqparat - Qyzylorda oblysynda eldi aldaý arqyly 80 mln teńgeni qaltaǵa basqan 26 jastaǵy azamatsha 3 jyl 6 aıǵa bas bostandyǵynan aıyryldy, dep habarlaıdy QazAqparat tilshisi.
Ol jergilikti turǵyndardy memlekettik baǵdarlama negizinde páter alyp beremin dep aldaǵan. Osylaısha alaıaqtyq jolmen aqsha alǵan. Sonyń saldarynan jábirlenýshi azamattarǵa 80 mln teńge shyǵyn keltirgen.
Qyzylorda oblystyq polıtsııa departamentiniń málimeti boıynsha byltyr alaıaqtyq deregi boıynsha 749 oqıǵa tirkelgen. Degenmen, turǵyndardyń kópshiligi ózderiniń aldanyp qalǵanyn kesh bilip jatady. Máselen, byltyr 629 jábirlenýshi polıtsııa qyzmetine ýaqytynan kesh shaǵym bildirgen. Olardyń arasynda 6 jyldan keıin shaǵym bildirgen turǵyn da bar. Al 12 adam 3 jyldan keıin ózderi aldanyp qalǵanyn aıtqan. Sondaı-aq, jergilikti jerdegi 128 turǵyn ózderiniń alaıaq qurbany bolǵanyn bir jyldan keıin bilgen.
«Bizdiń qolymyzdaǵy derekter alaıaqtyq jasaýmen aınalysqan adamdardyń kópshiligi 25-45 jastaǵylar ekenin kórsetip otyr. Olardyń basym bóligi - áıelder. Máselen, byltyr alaıaqtyq boıynsha 288 kúdiktiniń 189-yn áıelder quraǵan. Aıta keterligi, ınternet arqyly ózderiniń aram oılaryn júzege asyratyndar kóbeıip barady. Bıylǵy jyldyń basynan beri polıtsııa qyzmetine osyndaı jaǵdaıdy bastan ótkizgen 147 shaǵym kelip túsken», - dep habarlaıdy Qyzylorda oblystyq polıtsııa departamenti baspasóz qyzmetiniń basshysy Gúljahan Qaıyrbergenova.
Polıtsııa qyzmetkerleri azamattarǵa saqtyq sharalaryna kóńil bólý qajettigin aıtady. Ol alaıaqtyqtyń aldyn alýǵa óz septigin tıgizedi.
Sondaı-aq, Qyzylordada jasóspirimder arasynda qylmys órship turǵanyn jazǵan bolatynbyz.
