Qyzylordada 25 jastaǵy azamat áleýmettik jeli arqyly dinı arazdyqty týdyrmaq bolǵan
QYZYLORDA. QazAqparat - Qyzylorda OІІD Ekstremızmge qarsy kúres basqarmasynyń qyzmetkerleri áleýmettik jeliler men vıdeohostıngter boıynsha monıtorıng jumystaryn júrgizý barysynda áleýmettik, ulttyq, násildik jáne dinı arazdyqty týdyrýǵa baǵyttalǵan qasaqana áreketter jasady degen kúdikpen belgili bir azamattyń jeke paraqshasyn baıqaıdy.
Tıisti izdestirý jumystary nátıjesinde 25 jastaǵy Qyzylorda qalasynyń turǵyny ustalyp, ishki ister basqarmasyna jetkizildi, dep habarlady QazAqparat HAA tilshisi oblystyq ІІD silteme jasap.
Oǵan qatysty Qazaqstan Respýblıkasy Qylmystyq kodeksiniń 174-baby 1-bóligi boıynsha qylmystyq is qozǵalyp, tergeý barysynda aıǵaq zat retinde aýdıo-jazbalar alynyp, tıisti saraptamalar taǵaıyndaldy.
Nátıjesinde atalǵan azamattyń destrýktıvti dinı aǵymdy ustana otyryp, áleýmettik jelidegi óziniń paraqshasy arqyly áleýmettik, ulttyq, rýlyq, násildik, tektik-toptyq jáne dinı arazdyqty qozdyrýǵa baǵyttalǵan áreketterdi jasaǵany dáleldenip, aǵymdaǵy jyldyń 15 naýryzynda Qyzylorda qalalyq sotynyń sheshimimen «kináli» dep tanylyp, Qazaqstan Respýblıkasy Qylmystyq kodeksiniń 174-baby 1-bóligine sáıkes 2 jyl 10 aıǵa shartty túrde sottaldy.
