Qyzylordada 23 jastaǵy áıeldi balasymen atyp ketken kúdikti ustaldy
QYZYLORDA. QazAqparat - Qyzylordalyq polıtseıler myltyqpen áıel adamdy, 1 jastaǵy sábıimen atyp óltirip, qashyp ketken kúdiktini qolǵa túsirdi, dep habarlady OІІD baspasóz qyzmetinen.
«Ústimizdegi jyldyń 13 maýsymynda keshki saǵat 19.00 shamasynda kelip túsken habarlama boıynsha oqıǵa ornyna jedel-tergeý toby jiberilip, 1992 jyly týylǵan azamatsha men onyń qyzyn otbasylyq janjaldan keıin 1955 jyly týylǵan J.A. esimdi azamat atys qarýymen atqanyn anyqtady», delingen habarlamada. Osydan keıin kúdikti «Aýdı-80» markaly avtokóligimen oqıǵa ornynan qashyp ketken. Nátıjesinde, 23 jastaǵy áıel aýyr jaraqattan aýrýhanaǵa barar jolda qaıtys bolsa, 1 jasar sábı oblystyq medıtsına ortalyǵynyń «jansaqtaý» bóliminde kóz jumǵan.
Kúdikti azamattyń baǵyty beınebaqylaý kameralarynyń kómegi boıynsha anyqtalyp, jedel túrde polıtsııa qyzmetkerleri ony Júnisov kóshesinen ustady. Aıǵaq zat retinde qos uńǵyly 16 kalıbrli ańshy myltyǵy alyndy.
Qazirgi tańda ustalǵan kúdikti Qyzylorda QІІB-nyń ýaqytsha ustaý ızolıatoryna qamaldy. Atalǵan oqıǵa boıynsha QR QK 99-babynyń 2-bóligimen qylmystyq is qozǵalyp, sotqa deıingi tergeý amaldary júrgizilýde.
