Qyzylordada 22 myń túpke jýyq sora ósimdigi joıyldy

QYZYLORDA. QazAqparat - Qyzylordalyq polıtseıler «Qarasora» is-sharasy aıasynda 22 myń túp sora ósimdigin joıdy, dep habarlaıdy QazAqparat tilshisi.

Qyzylorda oblysynda bıyl 1 maýsym-31 qazan aralyǵynda «Qarasora-2022» keń aýqymdy arnaıy jedel-profılaktıkalyq is-sharasy ótkizildi. Nátıjesinde oblystyq polıtsııa departamenti tarapynan esirtki qylmysyna qatysty 121 quqyq buzýshylyq anyqtaldy. Onyń ishinde esirtki ósirýdiń - 55, esirtki satýdyń - 12, esirtkini asa iri mólsherde saqtaýdyń -14, esirtki jarnamalaýdyń - 2 deregi anyqtaldy.

«Zańsyz aınalymnan 72 kelige jýyq marıhýana jáne 501 gramm sıntetıkalyq esirtki zaty tárkilendi. Esirtki ósirýdiń 18 deregi dalalyq aımaqtaǵy iri esirtki alqaptarynda tirkelse, 37-si úı, baý-baqsha, saıajaı aýlalaryna egý deregi. Oqıǵa oryndarynda 21910 túp sora ósimdigi joıyldy. Jalpy 10 tonnaǵa deıin marıhýana shıki óniminiń zańsyz aınalymǵa túsý joly kesildi. Esirtki ósirýmen aınalysqan 54 adam qolǵa tústi», - dep málim etti Qyzylorda oblystyq polıtsııa departamentinen.

Vedomstvo málimetinshe, is-shara kezinde Qyzylorda qalasyna kire-beris tas joldarda qoıylǵan jyljymaly mobıldi beketterinde avtokólikterdi qyzmettik izdestirý ıtiniń kómegimen tekserý nátıjesinde esirtki tasymaldaýdyń 18 deregi belgili boldy. Sol arqyly Astana, Aqtóbe, Atyraý qalalaryna asa iri mólsherde tasymaldaýdyń 7 deregi anyqtaldy.

Eske salsaq, budan buryn Qyzylordada kásipkerlerdi bopsalaǵan qylmystyq top músheleri ustaldy.