Qyzylordada 2023 jylǵa deıingi ekonomıkalyq damý jospary júzege asyrylýda
QYZYLORDA. QazAqparat - Qyzylordada óńirdiń 2023 jylǵa deıingi ekonomıkalyq damý jospary júzege asyrylýda, dep habarlaıdy QazAqparat tilshisi.
Álemdi jaılaǵan pandemııa qoǵamnyń barlyq salasyna eleýli kedergisin keltirdi. Árbir aımaqtaǵy qazirgi áleýmettik-ekonomıkalyq jaǵdaıyna keri áserin tıgizdi. Ekonomıkanyń barlyq salasynda kóptegen problemalar týyndady.
«Bul Qyzylorda oblysynda ekonomıkanyń barlyq salasy men áleýmettik salaǵa aýqymdy taldaý júrgizýdi mindettedi. Azyq-túlik, azyq-túlik emes taýarlar men kórsetiletin qyzmetterdiń negizgi túrlerin óndirý jáne tutyný teńgerimine aýqymdy taldaýdy jedel júrgizýge sebep boldy. Taldaý qorytyndysymen aglomeratsııalyq tásil negizinde qyzmet túrleri saralandy. Sol arqyly 2023 jylǵa deıingi ekonomıkalyq damý jospary ázirlendi. Onyń sheńberinde bıznes salasyna 4600-den astam turaqty jumys ornyn qurýǵa múmkindik beretin 265 jobany iske asyrý usynyldy. Jobalardyń jalpy somasy 270 mlrd. teńgeden asady. Bul maqsatta bıyl 26 mlrd. teńgeni quraıtyn 110 joba iske asyryla bastady. Ol 2 myńǵa jýyq jumys orny qurýǵa múmkindik týǵyzady», - dedi Qyzylorda oblysynyń ákimi Gúlshara Ábdiqalyqova.
Atalǵan jospar arqyly óńirdiń resýrstyq áleýetin tıimdi paıdalanýǵa jol ashylady. Sondaı-aq, memlekettik baǵdarlamalar men memlekettik emes qarjy ınstıtýttarynyń baǵdarlamalaryn keshendi paıdalanýǵa nazar aýdarylady. Sol arqyly óńirdiń azyq-túlikpen jáne birinshi qajettiliktegi taýarlarmen ózin-ózi qamtamasyz etýdi qamtý, jańa jumys oryndaryn qurýǵa jaǵdaı jasalady.
