Qyzylordada 200 mln teńge salyqtan jaltarǵan kásipkerge úkim shyqty
Qyzylorda oblysy boıynsha Ekonomıkalyq tergep-tekserý departamenti 10 jyldan astam «turǵyn úılerge qurylys jumystaryn kórsetý» baǵytynda jumys jasaǵan seriktestiktiń salyqqa baılanysty zańsyzdyqqa jol bergenin anyqtady. Seriktestik dırektory deklaratsııany tabys etpeý nemese salyq salynatyn basqa da nysandardy jasyrý jolymen bıýdjetke tólenetin mindetti tólemderden jaltarǵan. Onyń kólemi 200 mln 256 myń teńgeni qurady.
Aıta keterligi, sottalýshy 2017-2018 jyldary 5 zańdy tulǵadan belgili kólemde syıaqy berý arqyly is júzinde oryndalmaǵan jumystar, kórsetilmegen qyzmetter jáne tıep-jóneltilmegen taýarlar úshin jalǵan shot-faktýra, oryndalǵan jumys aktilerin, qolma-qol esep aıyrysqandyǵy jóninde kvıtantsııa qujattaryn satyp alǵan.
«Qyzylorda qalasynyń №2 soty ony QR Qylmystyq kodeksiniń 245-baby 3-bóligimen kináli dep tanydy. Onda uıymdarǵa salynatyn salyqty jáne bıýdjetke tólenetin basqa da mindetti tólemderdi tóleýden jaltarý jaǵdaıy kórsetilgen. Sot oǵan kásiptik nemese kommertsııalyq uıymdarda basshylyq qyzmetin atqarý quqyǵynan úsh jyl merzimge aıyrý, shartty túrde bes jyl merzimge bas bostandyǵynan aıyrý týraly úkim shyǵardy. Jáne osy merzimge probatsııalyq baqylaý taǵaıyndaldy. Jaýapker jaltarǵan salyq somasyn óndirýge mindetteldi», - dep málim etti Qyzylorda oblysy boıynsha Ekonomıkalyq tergep-tekserý departamentinen.
Esterińizge sala ketelik, budan buryn Qyzylorda oblysynda 136 mln teńge kóleminde salyqtan jaltarǵan kásipker anyqtalǵan bolatyn.
