Qyzylordada 2 myńǵa jýyq adam koronavırýske qarsy vaktsına qabyldady
QYZYLORDA. QazAqparat - Qyzylorda oblysynda eki myńǵa jýyq adam koronavırýske qarsy vaktsına saldyrdy, dep habarlaıdy QazAqparat tilshisi.
Oblystyq densaýlyq saqtaý basqarmasynyń basshysy Sábıtbek Pazylovtyń aıtýynsha, oblysqa vaktsına 31 qańtar kúni jetkizilgen. Nátıjesinde «Spýtnık V» vaktsınasynyń alǵashqy 1000 dozasy 1-17 aqpan aralyǵynda tolyǵymen jergilikti turǵyndarǵa egilgen. Olardyń 939-y medıtsına qyzmetkeri bolsa, 61-i erikti túrdi ekpe qabyldaǵan qala turǵyndary.
«Qazir atalǵan vaktsınanyń ekinshi partııasy – 3600 dozasy jetkizildi. Alǵashqy jáne ekinshi márte ekpe qabyldaǵandar arasynda 1571 medıtsına mamany, 252 oqytýshy, 29 polıtsııa qyzmetkeri men ózge 107 azamat bar. Olardyń barlyǵynyń densaýlyq jaǵdaıy dárigerlerdiń baqylaýynda tur. Qolaısyz nemese asqyný jaǵdaıy ázirge tirkelgen joq», - dedi basqarma basshysy «Nur Otan» partııasy Qyzylorda oblystyq fılıaly janyndaǵy partııalyq baqylaý komıssııasynyń otyrysynda.
Óńirge barlyǵy 80 myń doza vaktsına kezeń-kezeńimen jetkiziledi. Egý jumystary bıylǵy jyldyń shilde aıyna deıin josparlanyp otyr.
Basqarma basshynyń aıtýynsha, vaktsınany saqtaý máselesine de nazar aýdarylǵan. Preparattar mınýs 18°S tómen temperatýrada saqtalady. Vaktsına sýyqtyq tizbegine sáıkes tasymaldanady.
