Qyzylordada 2 adamnyń denesi sýda qalqyp júrgen jerinen tabyldy

QYZYLORDA. QazAqparat - Qyzylorda oblysynda jyl basynan beri 2 adam sý betinde qalqyp júrgen jerinen tabylǵan. Onyń bireýi - bala, dep habarlaıdy QazAqparat tilshisi.

Bıyl Qyzylorda oblysynyń sý aıdyndarynda 10 oqys oqıǵa tirkelgen. Oqıǵalardyń saldarynan 11 adam qaıtys boldy, onyń 5-ýi bala.

«Oblystyń sý aıdyndarynda, ásirese, Syrdarııa ózeninde jylda azamattardyń ártúrli sebeptermen qaıǵyly jaǵdaılarǵa ushyraýy, onyń ishinde jaz aılarynda sýǵa shomylý kezeńinde olardyń sanynyń ósetini ózderińizge málim. Jyl basynan beri 11 adam qaza tapty. Onyń 3-ýi balyq aýlaý kezinde, 2 adam (onyń 1-i bala) belgisiz jaǵdaıda kóz jumǵan, ıaǵnı olardyń denesi tabyldy. Al 1 bala aryqqa qulap, kóz jumǵan. Al 5 adam (onyń 3-i bala) sýǵa túsýge arnalmaǵan orynda shomylý kezinde batyp ketken. Sondaı-aq,1 adam qutqaryldy. Sýda adamdardyń qaza bolýynyń negizgi sebebi qaýipsizdik erejelerin óreskel buzýy bolyp tabylady»,- dedi oblystyq Tótenshe jaǵdaılar departamenti bastyǵynyń orynbasary Rýslan Qaıraqbaev.

Mamandardyń aıtýynsha, sýǵa túsýge qaýipti aımaqtarda azamattardyń ruqsat etilmegen júzý quraldaryn qoldanýy jáne alǵashqy kómek kórsetý tásilderin bilmeıtindigi de qaıǵyly jaǵdaıdyń kóbeıýine yqpal etýde.

Budan buryn Qyzylordada bir jasar sábı aryqtaǵy sýǵa batyp ketti.