Qyzylordada 2 adam mert bolǵan kólik apatyna kináli júrgizýshi sottaldy
QYZYLORDA. QazAqparat - Qyzylorda oblysy Syrdarııa aýdandyq sotynda adam ólimine soqtyrǵan jol-kólik oqıǵasyna kináli azamatqa qatysty úkim shyqty, dep habarlaıdy QazAqparat tilshisi.
Syrdarııa aýdandyq sotynyń baspasóz hatshysy Meńdigúl Asannyń habarlaýynsha, bul keleńsiz jaǵdaı ústimizdegi jyldyń 5 tamyzynda saǵat 18-35 shamasynda bolǵan. Sottalýshy T. «Mersedes-Benz-E» markaly avtokóligimen «Batys Eýropa - Batys Qytaı» tas jolynda shyǵystan batys baǵytta kele jatqan azamattyń jol júrý erejesin buzýy saldarynan kóligi «Masda-626» avtokóligimen soqtyǵysqan. Kólik apatynda «Masda-626» avtokóliginiń artqy oryndyǵynda otyrǵan jolaýshy oqıǵa ornynda qaıtys boldy. Al sol kóliktiń júrgizýshisi E. jedel járdem kóligimen oblystyq aýrýhanaǵa bara jatqan jolda kóz jumdy.
Sottalýshynyń qylmystyq is-áreketi men óziniń kinásin moıyndap, ol is qujattarymen tolyq dáleldendi. Ol buryn qylmystyq quqyq buzýshylyq jasamaǵan, sotty bolmaǵan. Sotqa deıingi tergep-tekserý kezinde jáne basty sot talqylaýynda ol kinásin tolyq moıyndady. Jábirlenýshilerge keltirilgen materıaldyq jáne moraldyq zalal tolyqtaı óndirildi. Jábirlenýshiler oǵan keshirim bergen. Basty sot talqylaýynda jábirlenýshiler oǵan bas bostandyǵynan aıyrýmen baılanysty emes jaza taǵaıyndaýdy suraǵan.
«Sot úkimimen sottalýshy T. Qazaqstan Respýblıkasy Qylmystyq kodeksiniń 345-babynyń 4-bóligimen kináli dep tanyldy. Ol kólik quraldaryn 3 jyl júrgize almaıtyn boldy. Oǵan 5 jyl merzimge bas bostandyǵynan aıyrý jazasy taǵaıyndalydy. Qylmystyq kodekstiń 63-babyn qoldanyp, taǵaıyndalǵan jaza sol merzimge shartty dep eseptelip, probatsııalyq baqylaý belgilendi», - dedi aýdandyq sottyń sýdıasy Jaras Joldasov.
Esterińizge sala ketelik, qazan aıynyń basynda Qyzylordada adamnyń ómirin qıǵan jol apaty da oryn alǵan edi.
