Qyzylordada 19 medıtsına mekemesinde koronavırýsqa qarsy egý júrgizilýde
QYZYLORDA. QazAqparat - Qyzylorda oblysynda 19 medıtsınalyq mekemede koronavırýs ınfektsııasyna qarsy egý jumystary júrgizilýde, dep habarlaıdy QazAqparat tilshisi.
Óńirde 106 ekpe kabıneti ashylyp, 37 jyljymaly kóshpeli pýnkttiń jumysy uıymdastyrylǵan. Al, oblys boıynsha 19 medıtsına mekemesinde koronavırýs ınfektsııasyna qarsy egý jumystary júrgizilýde.
Oblysta 1 aqpannan beri koronavırýsqa qarsy salynatyn vaktsınanyń 238 350 dozasy jetkizilgen. Ekpe qabyldaǵan azamattarǵa «QazVac-in», «HayatVax», «Spýtnık – V», «CoronaVac» vaktsınalary salynýda.
Aıta keteıik, búgingi kúnge deıin oblysta 107344 adamǵa qaterli indetke qarsy vaktsına salyndy. Olardyń ishinde 43 myńnan astamy oblys ortalyǵynyń úlesine tıse, qalǵany - aýdandarda turatyn azamattar.
«Oblys «jasyl» aımaqqa turaqtandy. Áli de saqtyq sharalaryn kúsheıtip, turǵyndardy vaktsınalaý jumystaryn jandandyrý kerek. Qalypty tirshilikke qaıta oralýymyz úshin vaktsınany belsendi túrde salýymyz qajet. Bul rette oblystyq densaýlyq saqtaý basqarmasy men Qyzylorda qalasy men aýdan ákimderi, barlyq basqarma basshylary vaktsınalaý jumystaryn kúsheıtý kerek», - dedi aımaq basshysy Gúlshara Ábdiqalyqova oblys ákimdiginde ótken keńeıtilgen otyrysta.
Eske salsaq, budan buryn Qyzylordada 105 myńnan astam adam koronavırýsqa qarsy vaktsına saldyrǵanyn habarlaǵan edik.
