Qyzylordada 17 jastaǵy jasóspirim Syrdarııaǵa batyp ketti
Oqys oqıǵa 25 mamyrda jergilikti ýaqytpen saǵat 17.00 shamasynda bolǵan. Ol Syrdarııa ózeniniń ruqsat etilmegen aýmaǵynda sýǵa túsken.
«Oqıǵa ornyna 5 qutqarýshy 1 avtokólik jáne 1 qaıyq bardy. Qutqarýshylar jedel áreketke kiristi. Jasóspirimniń jansyz denesi saǵat 18.49 shamasynda jaǵaǵa shyǵaryldy», - dep málim etti Qyzylorda oblystyq tótenshe jaǵdaılar departamenti órt sóndirý jáne apattyq-qutqarý jumystary qyzmetiniń baspasóz hatshysy Álııa Erejepova.
Qyzylorda oblysynda jyl basynan beri barlyǵy 7 adam sýǵa ketip qaıtys boldy. Onyń bireýi - jasósprim, ekeýi - bala, qalǵany - eresek azamattar. Sondyqtan mamandar sýǵa túsý barysynda qaýipsizdik sharalaryn qatań saqtaýdy suraıdy. Byltyr bul jaǵdaıdan 26 adam qaza tapsa, onyń 10-y bala.
Budan buryn Qyzylordada 10 jasar bala sýǵa ketken edi. Ony izdestirýge 53 adam jumyldyryldy.
