Qyzylordada 17 adamdy órtten qutqarǵan polıtseıler: Biz óz mindetimizdi oryndadyq
QYZYLORDA. QazAqparat – Ótken jyldyń tamyz aıynda Qyzylorda qalasynda úsh polıtsııa qyzmetkeri 17 adamdy órtten qutqaryp qaldy. Tártip saqshylary bul erlikterin ózderiniń azamattyq mindeti dep sanaıdy, dep habarlaıdy QazAqparat tilshisi.
Sol kúni Qyzylorda qalasy polıtsııa basqarmasynyń kezekshi bólimine oblys ortalyǵy boıyndaǵy Qorqyt ata kóshesi men Óserbaev kósheleriniń qıylysynda kóp qabatty úıdiń birinde tórtinshi qabatta ornalasqan páterden órt shyǵyp jatqany jaıynda habarlama tústi. Jedel qyzmetter mamandarymen birge polıtsııa qyzmetkerleri Maqsat Jylqaıdarov, Maqsat Hasenov jáne Baqytjan Dosmaǵambetov oqıǵa ornyna kelip jetti.
«Biz oqıǵa ornyna barǵan sátte podezden qoıý qara tútinniń shyǵyp jatqanyn ańǵardyq. Kóp oılanyp turatyn ýaqyt joq. Dereý áreketke kiristik. Turǵyndardy dereý syrtqa shyǵaryp úlgerdik. Odan keıin órt shyǵyp jatqan páterdi ashyp, onda jalynǵa oranǵan dúnıelerdi óshirýge tyrystyq. Páter ıeleri úıde joq eken. Osylaısha adamdar ómirin aman saqtap qaldyq. Biz óz mindetimizdi oryndadyq», - deıdi Maqsat Hasenov.
Órttiń kórshi páterlerge taralý qaýpi bar ekenin ańǵardǵan Maqsat Hasenov pen Baqytjan Dosmaǵambetov órt bolǵan páterdiń esigin ashyp, onda oryn alǵan órtti sóndirýge kiristi. Al Maqsat Jylqaıdarov ótkir tútin saldarynan páterlerinen shyǵa almaı qalǵan turǵyndarǵa kómektesti. Olardyń arasynda úlkenderdiń baqylaýynsyz qalǵan balalar da bar edi.
Órt saldarynan jaryq ta sónip qalǵan bolatyn. Osyndaı qıyndyqtarǵa qaramastan polıtsııa qyzmetkerleri óz mindetterin joǵary deńgeıde atqaryp shyqty. Nátıjesinde barlyǵy 17 adam órtten qaýipsiz aımaqqa shyǵaryldy.
«Polıtsııa qyzmetkerleri óz ómirlerin qaterge tige otyryp, kóp qabatty úı turǵyndaryna kómektesti. Sol sátte turǵyndardy qutqarýǵa belsene atsalysqan Maqsat Jylqaıdarov, Maqsat Hasenov jáne Baqytjan Dosmaǵambetov syndy polıtsııa qyzmetkerleri eldiń alǵysyn aldy. Olardyń biri polıtsııa qyzmetinde on jyldan astam ýaqyttan beri qyzmet atqaryp kele jatsa, endi biri eńbek jolyn bastaǵanyna bir jyldan asqan. Olar ózderiniń batyl isterimen jas urpaqqa úlgi bola alady», - dep málim etti Qyzylorda oblystyq polıtsııa departamentiniń baspasóz qyzmeti.
Polıtsııa maıory Maqsat Jylqaıdarov ishki ister organdarynda 2008 jyldan beri qyzmet atqaryp keledi.Jubaıy - Almaǵambetova Aıjanmen birge 4 bala tárbıelep otyr. Ol sportty jaqsy kóredi. Al polıtsııa kapıtany Maqsat Hasenov ishki ister organdarynda 2013 jyldan beri qyzmet atqaryp keledi. Otbasyly, 2 bala tárbıeleýde. Polıtsııa leıtenanty Baqytjan Dosmaǵambetov ishki ister organdarynda nebary 2 jyldaı qyzmet atqaryp keledi. Otbasyly, 2 bala tárbıeleýde.
